نۇرتاس ادامباي تۇسىرگەن فيلمنىڭ ساۋندترەگى ۇرلانعان بولىپ شىقتى
بۇل تۋرالى پروديۋسەر نۇرتاس ادامباي ءمالىم ەتتى، دەپ حابارلايدى قازاقپارات ءتىلشىسى.
«سامايا ۆىشكا» ءانى - پلاگيات. وعان كليپ تۇسىرمەس بۇرىن ءبىز جىگىتتەردەن اۆتورلىق قۇقىق تۋرالى سۇراپ ەدىك. ولاردىڭ ءبارى ويداعىداي دەپ جاۋاپ بەرگەن بولاتىن. جۋىقتا YouTube جەلىسىن اقتارىپ وتىرىپ، «نۇرتاس ادامباي نەنى جاسىرادى؟» دەگەن ۆيدەونى كورىپ قالدىم. سودان كەيىن وسى ءاندى ورىندايتىن جىگىتتەردىڭ بىرنەشە نوتانى قايتا وڭدەي سالعانىن عانا ءبىلدىم. ءبىراق، جىگىتتەر ءاندى العاش شىعارعان كەزدە مىنە بىزدە وسىنداي دارىندار شىعىپ جاتىر دەپ قۋانعانىم ەسىمدە. ولاي بولماي قالدى. وكىنىشتى-اق»، - دەيدى نۇرتاس ادامباي ءوزىنىڭ Instagram پاراقشاسىندا.
ەسكە سالا كەتسەك، الەۋمەتتىك جەلىدەن اتالعان انشىلەردىڭ ءانىن ەستىگەننەن كەيىن نۇرتاس ادامباي جاس ورىنداۋشىلاردى سەرىكتەستىككە شاقىرعان بولاتىن. «مەن - كۇيەۋمىن» فيلمىنە ساۋندترەك رەتىندە شىققان «سامايا ۆىشكا» ءانى وسى جىلدىڭ ناۋرىز ايىندا پروكاتقا شىققان. كەيىن وسى انگە كليپ تە تۇسىرىلگەن ەدى.
