الماتى وبلىسىندا مەنينگوكوكك جۇقپاسىنان ءۇشىنشى ادام كوز جۇمدى
اتالمىش فاكتىنى قوعامدىق دەنساۋلىق ساقتاۋ دەپارتامەنتىنىڭ باسشىسى ەرعالي سىدىمانوۆ راستادى.
«19 جاستاعى بويجەتكەن قايتىس بولدى. تالعار اۋدانىنىڭ تۋماسى، الايدا الماتى قالاسىنىڭ ماڭىندا كوللەكتورلىق كومپانيادا جۇمىس جاساپ جۇرگەن. بارلىعى جەدەل بولدى، اۋرۋحاناعا تۇسكەن سوڭ نەبارى ەكى ساعاتتىڭ ىشىندە كوز جۇمدى. بۇل - وبلىسىمىزدا مەنينگوكوكك جۇقپاسىنان كوز جۇمعان ءۇشىنشى ادام. زەرتحانالىق تۇردە ءالى راستالماعانىمەن، كلينيكالىق قورىتىندىلار ءدال وسى جۇقپاعا كەلەدى»، - دەدى مەكەمە باسشىسى ە. سىدىمانوۆ.
ەسكە سالا كەتەيىك، العاشقى جاعداي ءساۋىردىڭ سوڭىندا بولعان. ناۋقاستىڭ وسى تۇرىنەن 22 جاستاعى جىگىت قايتىس بولدى.
ءبىر اي وتكەن سوڭ تالدىقورعاندا جۇقپالى اۋرۋلار اۋرۋحاناسىندا 3 جاسار كىشكەنتاي قىز باقيلىق بولدى.
ءوڭىردىڭ دارىگەرلەرى تۇرعىندار اراسىندا اۋرۋدىڭ الدىن الۋ ءۇشىن پروفيلاكتيكالىق جۇمىستاردى كۇشەيتتى.
