ءوز ورتاسى ۇلگى تۇتار جاس تالانتتار
بالا كۇنىمىزدە ءبارىن ەسەيگەن سوڭ ىستەيمىن دەيمىز. ال قارتايعاندا «اتتەڭ، جاس كۇنىم قايتا كەلەر بولسا عوي، ءبارىن تىندىرار ەم. قازىر كەش» دەپ وكىنەمىز. بۇل جەر بەتىندەگى تابىسقا جەتە الماعان ادام بىتكەننىڭ پسيحولوگيالىق ءالجۋازدىعى عانا. ءار ىسكە دەر كەزىندە كىرىسكەن ءجون. وتىزىندا جاسپىن دەپ جۇرە بەرگەننەن، ون بەسىندە باسپىن دەپ بەلىن بۋىنعانعا نە جەتسىن. ءبىز ءوز ۇرپاعىمىزدىڭ تالانتىن بالا كۇنىندە- اق بايقايمىز. ءاربىر اتا- انا سول تالانتتى بالاسىن ماقتانىش تۇتادى. ال ەڭ ۇلكەن قاتەلىگىمىز - باۋىر ەت بالامىزدىڭ سول تالانتىن ۇشتاۋعا جاعداي جاساۋ جاعىنان كەشىگىپ قالاتىن ساتتەرىمىز بولادى. تالانت جاس تالعامايدى. دەي تۇرعانمەن بالا كەزدە تالانتتىڭ ۇشتالۋى - بولاشاققا الىپ ۇشار قانات ىسپەتتى. بولايىن دەگەن بالانىڭ، بەتىن قاقپا، بەلىن بۋ - دەيدى. جاس تالانتتارعا قولداۋ كورسەتۋ، شالىس باسسا دەمەۋ بەرۋ، قاناتتاندىرىپ زور سەنىم ارتۋ - ءاربىرىمىزدىڭ ازاماتتىق پارىزىمىز. تالانت يەلەرى ءوز جانىمىزدا ءجۇرۋى دە مۇمكىن. سەبەبى تالانتسىز ادام جوق - جالقاۋلار بار.. .
تالانت جايلى اڭگىمە ايتقاندا، توسىلىپ قالمايتىنىمىز راس. ونداي جانداردى كورىپ، ولارمەن قاتار ءجۇرمىز دە. بۇگىنگى كەيىپكەرلەرىمىز دە ءوز ورتاسى ۇلگى تۇتار جاس تالانتتار. ولاردان ۇستازدارى مەن تاربيەشىلەرى زور ءۇمىت كۇتەدى. جۇگىرۋدەن جالىقپايتىن جاس جەلاياق جانى قالايتىن جۇمىستان جالىقپايتىن جاندار بولادى. ول مەيلى كاسىپكە بايلانىستى، بولماسا سپورتقا بايلانىستى بولسىن. ەڭ باستىسى - ول ءوز ىسىنەن ءلاززات الادى، جەتىستىككە جەتۋ جولىنداعى قۇلشىنىسى ماحابباتقا تولى بولادى. سونداي جاس تالانتتاردىڭ ءبىرى - ءامىر ءىلياس. ءامىر الماتىداعى №88 جالپى ءبىلىم بەرەتىن مەكتەپتە وقيدى. مەكتەپ قابىرعاسىندا ءجۇرىپ- اق سپورتتىق شارالاردان قالىس قالعان ەمەس. فۋتبول، جەڭىل اتلەتيكا، ەركىن كۇرەس سەكسيالارىنا قاتىسادى. سونداي- اق كوپتەگەن مارافون جارىستارىنا قاتىسقان. بيىل ءامىر ىلە وزەنىنىڭ جاعالاۋىنداعى تامعالى تاس شاتقالىندا وتكەن Tengri Ultra مارافونىنا قاتىستى. قاتىسقاندا دا 70 شاقىرىمدىق ۋلترامارافونعا جۇگىردى. كىل جەلاياقتار قاتىسقان جارىستا ۇزدىكتەر قاتارىنان كورىنبەسە دە، سوڭىنا دەيىن شىداپ باقتى. 11:58:38 ساعات ۋاقىت كورسەتكىشىمەن مارە سىزىعىن كەستى.
- ءوزىم اسكەري كلۋب قاتارىندامىن. سوندىقتان بۇل مارافونعا قاتىسۋ ماعان تەگىن بولدى. 70 شاقىرىمدى جۇگىرىپ ءوتۋ ءوزىمنىڭ زور جەتىستىگىم دەپ ويلايمىن. الداعى ۋاقىتتا وزگە ەلدە وتەتىن وسىنداي تاعى ءبىر ۋلترامارافونعا قاتىسۋ مۇمكىندىگىم بار، - دەيدى ءامىر. جاس جەلاياق كەشكىلىك جۇگىرۋدىڭ پايداسى زور دەيدى. ءوزى دە كۇندە كەشقۇرىم ۋاقىتتا جۇگىرەدى ەكەن. بۇل كەزدە ادامنىڭ بۇلشىقەتتەرى قۇرىسىپ قالمايتىن كورىنەدى. ءامىر ءىلياس قازىر بىرنەشە سپورت تۇرىنە قاتىسىپ، شەبەرلىگى شىڭداپ ءجۇر. دەي تۇرعانمەن كەلەشەكتە ەركىن كۇرەستەن بيىك بەلەستەردى باعىندىرعىسى كەلەدى.
گولوۆكيندەي بوكسشى بولسام دەيدى!
قازىر كاسىپقوي بوكسشى گەننادي گولوۆكيندى تانىمايتىن قازاق سپورتى جانكۇيەرلەرى جوق تا شىعار. گەنانى الەم جۇرتشىلىعى دا تانيدى.
ەكىنشى كەيىپكەرىمىز GGG سەكىلدى الەم تانىعان بوكسشى بولعىسى كەلەتىن - يليا فرولوۆ. 6 سىنىپتى اياقتاعان يليا بوكسپەن شۇعىلدانادى. الماتىداعى №1 وبلىستىق بالالار ءۇيىنىڭ تاربيەلەنۋشىسى. بوكستان وزگە فۋتبول، دجيۋ- دجيتسۋ سەكىلدى سپورت تۇرلەرىنە دە قاتىسادى. قازاق تىلىندە سايراپ تۇرعان يليا دومبىرا تارتۋدى دا مەڭگەرگەن تالانت ەكەن. يليانىڭ بوكسپەن شۇعىلدانىپ جۇرگەنىنە 2 جىلدان اسىپ قالعان. جۋىردا الماتىدا وتكەن رەسپۋبليكالىق تۋرنيردە 34 ك گ سالماقتا توپ جارعان. كەلەر جىلى سپورت شەبەرلىگىنە كانديدات بولۋ ماقساتىن العا قويعان. گەنناديي گولوۆكين سىندى تانىمال بوكسشى بولسام دەيدى. سونداي- اق قانات يسلام مەن جانقوش تۇراروۆتىڭ جۇدىرىقتاسۋ مانەرى ۇنايتىنىن ايتادى. - گەننادي گولوۆكيننىڭ فاناتىمىن. قانات يسلام مەن جانقوش تۇراروۆتىڭ جۇدىرىقتاسۋ ستيلدەرى ۇنايدى. بولاشاقتا بوكستا ماعان باسەكەلەستىك جوعارى بولاتىنى راس. ءبىراق ودان قورىقپايمىن. باسەكەلەستىك مەنى شيراتا تۇسەدى، - دەيدى يليا.
Massaget.kz
