تەڭگە ىلۋدەن ازيا چەمپيوناتى: بىرىنشى ەكىنشى ورىن قازاق سپورتشىلارىنىڭ قانجىعاسىندا
ازيا چەمپيوناتىنىڭ جەڭىمپازدارىن ماراپاتتاۋ راسىمىنە قاتىسقان قازاقستان رەسپۋبليكاسىنىڭ مادەنيەت جانە سپورت ءمينيسترى سپورتتىڭ دامۋىنا ۇلەس قوسقان ازاماتتارعا العىس ءبىلدىردى.
«بۇل ايتۋلى شارا ءبىزدىڭ اسەم دە كورىكتى ەلوردامىز - استانانىڭ 20 جىلدىعىن اتاپ ءوتۋ اياسىندا وتكىزىلىپ وتىر. ەلباسى نۇرسۇلتان ءابىش ۇلى سپورتتىڭ دامۋىنا، اسىرەسە ۇلتتىق سپورت تۇرلەرىنىڭ دامۋىنا ەرەكشە كوڭىل اۋداراتىنىن بىلەسىزدەر. بۇگىنگى شارانى وتكىزۋگە نەگىز بولىپ وتىرعان ۇلتتىق سپورتتىڭ دامۋىنا زور ۇلەس قوسىپ جۇرگەن قايرات ساتىبالدى ۇلى، بەكبولات تىلەۋحان مىرزاعا، سونىمەن قاتار حالىقارالىق قازاق كۇرەسى فەدەراتسياسىنىڭ باسشىسى قانات الدابەرگەن ۇلىنا، مەيماندارعا العىس بىلدىرەمىز» ، - دەدى ارىستانبەك مۇحامەدي ۇلى.
تەڭگە ىلۋدەن قازاقستان قۇراماسىنىڭ باپكەرلەر القاسى رەسپۋبليكا چەمپيونى ماعجان ساپاربەك پەن 2015 -جىلعى ازيا چەمپيونى، 2017 -جىلعى «اق ءبيداي» اۋىل سپورتى ويىندارىنىڭ جەڭىمپازى عالىمجان ءىزجانوۆقا سەنىم ارتقان بولاتىن. مايتالماندار ۇدەدەن شىعا ءبىلدى. قۇراما باپكەرى نۇركەن بايبورييەۆتىڭ ءۇمىتىن اقتاعان كىل مىقتىلار العاشقى ەكى ورىندى قانجىعاسىنا بايلادى.
تەڭگە ىلۋدەن ءۇشىنشى ورىن قىرعىز سپورتشىسى امانتۋر مينۋۋرۋۋلۋعا بۇيىردى. جۇلدەلى ءتورتىنشى جانە بەسىنشى ورىن موڭعوليادان كەلگەن سەرىك جەڭىسبەك پەن بوبورودجان مۋسويەۆتىڭ ەنشىسىنە بۇيىردى.
ايتا كەتسەك، ەرتەڭ «قازاناتتا» اۋدارىسپاقتان III ازيا چەمپيوناتى وتەدى. بەس سالماق بويىنشا سىنعا تۇسەتىن 9 ەل سپورتشىلارىنىڭ سايىسى اسا تارتىستى وتەتىنى انىق. بۇل دودادا قازاق ەلىنىڭ نامىسىن ازامات سەرعازين، شىڭعىسحان ەرجانوۆ، ەسىمحان ءراحماتىللا، سىرىم ءىزباساروۆ، ءبىرجان قوساليەۆ سەكىلدى ازاماتتار قورعايدى. اسا اۋىر سالماقتاعى ءبىرجان قوساليەۆ - ەكى دۇركىن ازيا چەمپيونى (2014, 2016 ) . 2017 -جىلى استانادا وتكەن حالىقارالىق ءتۋرنيردىڭ اسا اۋىر سالماقتاعى جانە ءابسوليۋتتى سايىستاعى جەڭىمپازى. سىرىم ءىزباساروۆ - اۋىر سالماقتا ەكى دۇركىن ازيا چەمپيونى (2014, 2016) . ازيانىڭ 2016 -جىلعى ءابسوليۋتتى جەڭىمپازى. ا. سەرعازين، ش. ەرجانوۆ، ە. ءراحماتىللا - تالاي جارىستا توپ جارعان مىقتى سپورتشىلار. ۇلتتىق قۇرامانىڭ جەتەكشىلەرى - قۋانىشبەك قۇرامايەۆ پەن جانباتىر بەكمۇسايەۆ.
تەڭگە ءىلۋ مەن اۋدارىسپاقتان 2018 -جىلعى ازيا چەمپيوناتى 2 - ماۋسىم كۇنى اياقتالادى.
ايتا كەتسەك، قوس ۇلتتىق سپورت تۇرىنەن ازيا چەمپيوناتتارىنا 9 ەلدەن، اتاپ ايتقاندا، قازاقستان، وزبەكستان، قىرعىزستان، تاجىكستان، موڭعوليا، رەسەي، اۋعانستان، قىتاي، تۇركيادان 54 سپورتشى، ال جالپى جارىسقا قاتىساتىن دەلەگاتسيا مۇشەلەرىن قوسقاندا 100 گە تارتا ادام قاتىسۋدا. چەمپيوناتتاردىڭ جالپى جۇلدە قورى - 14 ميلليون تەڭگە.
