ەلباسى نازاربايەۆ ۋنيۆەرسيتەتى تۇلەكتەرىنە اقىلىن ايتتى
«بارلىقتارىڭىز وسى ومىردە ۇلكەن جەتىستىكتەرگە جەتۋدى قالايسىزدار. مەنىڭشە، سەندەر ءوز ماقساتتارىڭا جەتەسىڭدەر. ماعان تاۋەلسىز قازاقستاندى قۇرۋ مىندەتى بۇيىردى. ەگەمەن ەلىمىزدى قۇردىق، كارتاعا ەنگىزدىك. قازاقتى دۇنيەجۇزىنە تانىتۋ جۇمىسى ماعان بۇيىردى. مەملەكەتتى قۇرۋ، ەكونوميكاسىن كوتەرۋ، ونىڭ ۇستىنە قازاقتىڭ تاريحىندا تۇڭعىش رەت ءوز شەشىمىمەن ءوز استاناسىن تۇرعىزۋعا اتسالىستىق. وسىنىڭ ءبارى ءبىزدىڭ قولىمىزدان كەلدى. بيىل 20 جىلدىعىن اتاپ وتەيىن دەپ وتىرمىز. مىنانداي ۋنيۆەرسيتەت سالعىزدىق، تۇلەكتەردى دايىندادىق. ەڭ بولماسا، ماعان ۇقساپ بىردەڭە ىستەڭدەر»، - دەدى ن. نازاربايەۆ سالتاناتتى شارادا.
ايتا كەتەيىك، بۇگىن نۇرسۇلتان نازاربايەۆ بارشا ۋنيۆەرسيتەت تۇلەكتەرىن قۇتتىقتادى. پرەزيدەنتتىڭ ايتۋىنشا، وتكەن جىلى نازاربايەۆ ۋنيۆەرسيتەتى الەمدىك جوعارى وقۋ ورىندارى اليانسىنىڭ قۇرىلتايشىسى اتاندى. وسىلايشا، سينگاپۋر، جاپونيا، قىتاي، ءۇندىستان، قىتاي، وڭتۇستىك كورەيا سياقتى ەلدەردىڭ ەڭ ۇزدىك ۋنيۆەرسيتەتتەرى قاتارىنان كورىندى.
«"بولاشاقتا ەلىمىزدىڭ بارلىق جوعارى ورىندارى سىزدەرگە قاراپ، بوي تۇزەپ، ءبىلىم بەرۋ ءتاسىلىن وسى ۇلگىگە كوشىرۋى كەرەك. قازىر باسقا دا ۋنيۆەرسيتەتتەردە جاستارىمىز وقۋىن اياقتاپ جاتىر. كوپ تۇلەكتەر مامان بولىپ شىعىپ جاتىر. سوندىقتان سولاردىڭ بارلىعىن شىن جۇرەكتەن قۇتتىقتايمىن»، - دەپ اتاپ كورسەتتى ن. نازاربايەۆ.
