نۇرسۇلتان نازاربايەۆ بارشا ۋنيۆەرسيتەت تۇلەكتەرىن قۇتتىقتادى
بيىل اتالعان جوعارى وقۋ ورنى ءتورتىنشى رەت تۇلەكتەردى شىعارىپ سالۋ ءراسىمىن وتكىزىپ وتىر، دەپ حابارلايدى قازاقپارات ءتىلشىسى.
«ءبىز نازاربايەۆ ۋنيۆەرسيتەتىن العاش اشقاندا جاھاندىق تەحنولوگيالاردىڭ دامۋ جاعدايىندا ەلدى العا باستايتىن بىلىكتى مامان دايارلاۋدى ماقسات ەتكەن بولاتىنبىز. مىنەكي، سول ماقساتىمىزعا جەتىپ وتىرمىز. ءبىلىم ورداسىنان بۇعان دەيىن قانات قاققان 1800 جاس مامان بۇگىندە قازاقستاندا جانە دامىعان ەلدەردە سان الۋان سالادا تابىستى ەڭبەك ەتىپ جاتىر. جۇزدەگەن تۇلەك الەمنىڭ ايگىلى ۋنيۆەرسيتەتتەرىنەن شاقىرۋ الىپ، بىلىمدەرىن ءارى قاراي جالعاستىرۋدا. وسىنىڭ ءبارى وسى جەردەگى ءبىلىمنىڭ ساپالى ەكەنىن كورسەتسە كەرەك. ۋنيۆەرسيتەتتىڭ ءاربىر تۇلەگى قازاقستاننىڭ الەۋەتىن ارتتىرۋعا ۇلەس قوساتىن تىڭ قۋات بولاتىنىنا سەنەمىن» ، - دەدى ن. نازاربايەۆ سالتاناتتى شارادا.
پرەزيدەنتتىڭ ايتۋىنشا، وتكەن جىلى نازاربايەۆ ۋنيۆەرسيتەتى الەمدىك جوعارى وقۋ ورىندارى اليانسىنىڭ قۇرىلتايشىسى اتاندى. وسىلايشا، سينگاپۋر، جاپونيا، قىتاي، ءۇندىستان، قىتاي، وڭتۇستىك كورەيا سياقتى ەلدەردىڭ ەڭ ۇزدىك ۋنيۆەرسيتەتتەرى قاتارىنان كورىندى. «بولاشاقتا ەلىمىزدىڭ بارلىق جوعارى ورىندارى سىزدەرگە قاراپ، بوي تۇزەپ، ءبىلىم بەرۋ ءتاسىلىن وسى ۇلگىگە كوشىرۋى كەرەك. قازىر باسقا دا ۋنيۆەرسيتەتتەردە جاستارىمىز وقۋىن اياقتاپ جاتىر. كوپ تۇلەكتەر مامان بولىپ شىعىپ جاتىر. سوندىقتان مەن سولاردىڭ بارلىعىن شىن جۇرەكتەن قۇتتىقتايمىن» ، - دەپ اتاپ ءوتتى ن. نازاربايەۆ.
ايتا كەتەيىك، بيىل نازاربايەۆ ۋنيۆەرسيتەتىن 811 ادام ءتامامداپ وتىر. ولاردىڭ ىشىندە 506 ستۋدەنت، 302 ماگيسترانت جانە 3 دوكتورانت بار. ۋنيۆەرسيتەت باسشىسى شيگەو كاتسۋدىڭ ايتۋىنشا، تۇلەكتەردىڭ جارتىسىنان كوبى بىردەن جۇمىسقا ورنالاسادى. «ولار قارجى قىزمەتتەرى، ينجەنەريا، روبوت تەحنيكاسى سياقتى سالالاردا ەڭبەك ەتىپ ءجۇر. كونسالتينگتىك كومپانيالارعا ورنالاسقاندار دا بارشىلىق. تۇلەكتەردىڭ ءبىراز بولىگى ءوز كاسىبىن اشىپ جاتادى. بىزدە وقىعان جاستاردىڭ كوبىسى قازاقستاندا جۇمىس ىستەپ ءجۇر. ال شەتەلگە كەتكەندەر، كوپ جاعدايدا، ءوز بىلىمدەرىن شىڭداۋعا بارادى» ، - دەيدى ش. كاتسۋ.
