قازاق بالاسىنىڭ داۋسى قىتاي ەلىن ءتانتى ەتتى

نەبارى 13 جاسىندا حالىقارالىق بايقاۋعا قاتىسقان باقىتجان انسۇيەر قاۋىمدى قازاق انىمەن ءتانتى ەتكەن بولاتىن.

 وسىلايشا باس جۇلدەنى جەڭىپ العان ول شەتەلدە وتەتىن كەزەكتى ءان فەستيۆالىنە دايىندىق جۇرگىزۋدە. باقىتجان وتباسىندا ءۇيدىڭ كەنجەسى. الدىندا ءتورت اپكەسى بار. ونەر الەمىنە قانات قاققانىنا دا كوپ بولا قويماعان. سوندا دا بولسا جەتكەن جەتىستىگى از ەمەس، دەپ جازادى 24 ارنا.

ەلىمىزدە وتكەن بالالار اراسىنداعى بىرنەشە فەستيۆالدەردىڭ باس جۇلدە يەگەرى. بەرتىندەگى بەلەسى اسپاناستى ەلىندە وتكەن «قىتاي- قازاق دوستىعى» حالىقارالىق بايقاۋدا تاعى دا باس جۇلدەنى قانجىعالاعان. ەندىگى ارمانى كاسىبي مۋزىكانت اتانۋ.

«اتاقتى ءانشى بولعىم كەلەدى. سوسىن ونەر كوللەدجىنە ءتۇسىپ ارى قاراي ونەر جولىنا كەتۋدى ارماندايمىن. ونەردىڭ ىشىندە ءوزىم ەسترادالىق ۆوكالدى تاڭدايمىن. بولاشاقتا ەندى ءتۇرلى- ءتۇرلى اندەر جازىپ، سول اندەردى حيتقا اينالدىرىپ، قازاقستانعا تانىمال بولسام اندەرىمدى ۇلكەن ساحنالارعا الىپ شىعامىن»، - دەيدى جاس ءانشى.

اكەسى بەكبول مەن اناسى ريتانىڭ كوز قۋانىشىنا اينالعان ۇلدارى اۋەلگى دايىندىعىن اتا- اناسىنا كورسەتەدى. قاتەسىن تۇزەيتىن دە، باعاسىن بەرەتىن دە باقىتجاننىڭ العاشقى تىڭدارمانى وسى ەكى جان.

«كەشكە جۇمىستان كەلەمىز. تۇنگى كەزدەرى ءوزى مۋزىكامەن اينالىسىپ، ۇيىقتاتپايدى ءبارىمىزدى. تىڭداپ وتىرامىز ءبارىمىز. دايىندىقتى سولاي جاسايدى. اينالىساتىنى ءان. كەي كەزدەرى ءوزىنىڭ دە باسقا دا داۋسىن سالىپ سونداي قاسيەتتەرى بار. ودان كەيىن ولەڭ دە شىعارىپ تاستايدى»، - دەيدى باقىتجاننىڭ اناسى ريتا قوجابەكوۆا.

 باقىتجان بەكبول ۇلى كەنتاۋ قالاسى ءال- فارابي اتىنداعى №14 مەكتەپتىڭ 8-سىنىبىنا اياق باستى. ول سونداي- اق س. بايتەرەكوۆ اتىنداعى ساز مەكتەبىندە ۆوكال جانە دومبىرا بويىنشا ءدارىس الادى. ۋاقىتتى بوسقا وتكىزبەيتىن ونەرپاز ءاردايىم شىعارماشىلىعىن شىڭداپ، دايىندىقتا جۇرەدى. باقىتجاننىڭ بۇگىندە جەكە رەپەرتۋارىندا 10 نان استام ءانى بار. جەرلەستەرىنە ارناپ العاشقى كونتسەرتىن دە وتكىزىپتى. ەلىن جەرىن سۇيەتىن پاتريوت ازامات «تۋعان جەر» انىنە بەينەكليپ ءتۇسىرىپ ۇلگەرگەن.

Stan.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى