ق ر جوعارعى سوتىنىڭ ءتوراعاسى جەتى باستاماسىن قالاي ىسكە اسىراتىنىن ايتتى
ق ر جوعارعى سوتىنىڭ ءتوراعاسى جاقىپ اسانوۆتىڭ ايتۋىنشا، بۇگىندە ءاربىر جەتى جوبا بويىنشا جۇمىس توپتارى قۇرىلدى. اتالعان جوبالاردىڭ ىشىندە ءمىنسىز سۋديانى قالىپتاستىرۋدان باستاپ ەلەكتروندى سوتقا دەيىنگى بارلىق ماسەلەلەر ەسكەرىلگەن.
«كەلەسى اپتادا ءبىز جوبالىق كەڭسەنى جابدىقتاۋدى اياقتايمىز. بۇگىندە ءاربىر كوماندانىڭ قۇرامى بەكىتىلدى. ءبىر كوماندادا ەكى ادام بار. ولار جوبالاردى ىسكە اسىرۋمەن عانا اينالىسادى. ءاربىر جوبانىڭ تەحنيكالىق جاعى بار، ادىستەمەلىك جاعى بار، جوبالىق كەڭسە سونىڭ ءبارىن ۇيلەستىرەتىن بولادى. سوتتىڭ باسقا قىزمەتكەرلەرى دە وسى جۇمىسقا اتسالىسادى. كوماندالاردىڭ بارلىق وي-يدەيالارى نەگىزىندە سوت جۇيەسىن دامىتۋدىڭ جاڭا تۇجىرىمداسى ازىرلەنەدى»، - دەدى ج. اسانوۆ جوعارعى سوت جانىنداعى حالىقارالىق كەڭەستىڭ بۇگىنگى وتىرىسىندا.
ايتا كەتەيىك، كەڭەس وتىرىسىندا جاڭا اكىمشىلىك راسىمدىك-پروتسەستىك كودەكسىنىڭ جوباسى تالقىلاندى. وسى ورايدا شەتەلدىك جانە وتاندىق ساراپشىلار اتالعان قۇجاتقا قاتىستى ءوز ويلارىن ورتاعا سالدى. باس سۋديا جاقىپ اسانوۆتىڭ ايتۋىنشا، وسى ايدا جاڭا كودەكس ۇكىمەتكە تانىستىرىلادى. ال تامىز ايىندا پارلامەنتتىڭ قاراۋىنا ەنگىزىلەدى.
