وردا ءپىشىندى ورتالىق - ايگىلى «حان شاتىردىڭ» قۇرىلىسى قالاي جۇرگىزىلدى
«حان- شاتىر» ساۋدا، ويىن- ساۋىق ورتالىعى 2010 -جىلدىڭ 6 - شىلدەسىندە رەسمي تۇردە اشىلعان. نىساننىڭ باستى ەرەكشەلىگى - تەحنيكالىق يننوۆاتسيانىڭ كونەدەن سىر- شەرتەر بەت- بەدەرمەن ەرەكشە ۇيلەسۋى دەپ ايتۋعا بولادى. سونىمەن بىرگە، ءزاۋلىم عيماراتتىڭ پوليمەرلى جابىندىسى ارقىلى ساۋدا ورتالىعىنىڭ جانعا جايلى ەرەكشە كليماتىن سەزىنەسىز. ورتالىقتىڭ ىشىندە تەمپەراتۋرانى رەتتەۋدىڭ كوپساتىلى جۇيەسى جۇمىس ىستەيدى. عيماراتتىڭ شاتىرىنىڭ بيىكتىگى 150 مەترگە (توبەسىنە دەيىن) جەتەدى.
«حان شاتىر» ويىن- ساۋىق ورتالىعىنىڭ باس ديرەكتورى ەنگين اسرالان ءوز اڭگىمەسىندە قازاقستانداعى زاماناۋي سيمۆول- عيماراتتاردىڭ ءبىرىنىڭ ىرگەسى قالاي قالانعانىن، قۇرىلىس بارىسىندا قانداي قيىندىقتار كەزدەسكەنىن ايتىپ بەردى.
«حان شاتىر» ساۋدا ورتالىعىن سالۋ يدەياسى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆقا تيەسىلى. وسىناۋ اسقاق يدەيانى زامانىمىزدىڭ وزىق ساۋلەتشىسى، بىرەگەي نىساننىڭ ىرگەسىن قالاۋشى نورمان فوستەر ىسكە اسىردى. فوستەر تەك «حان شاتىردىڭ» عانا ەمەس، ەلورداداعى ەڭ ىرگەلى بىرنەشە عيماراتتىڭ دا اۆتورى ەكەنىن ايتا كەتۋ كەرەك. 2010 -جىلى سالتاناتتى تۇردە اشىلعان «حان شاتىر» كەرە تارتىلعان تروستاردىڭ ارقاسىندا ارنايى اشىق توسەمدى ۇستاپ تۇرعان سۇمبىدەن تۇرادى. توسەمنىڭ ەرەكشە حيميالىق جابىندىسى شاتىردىڭ كەڭىستىگىن تەمپەراتۋرانىڭ اۋىتقۋىنان قورعاپ، نىسان ىشىندەگى ميكروكليماتتى ساقتاپ تۇرۋعا مۇمكىندىك بەرەدى. وسى جانە وزگە دە تەحنولوگيالاردىڭ ارقاسىندا «حان شاتىر» الەمدەگى ون ەكو- عيماراتتاردىڭ قاتارىنا ەنگىزىلدى» ، - دەيدى ول.
باس ديرەكتوردىڭ ايتۋىنا قاراعاندا، نىساندى تۇرعىزۋدى «Sembol Construction» تۇرىك قۇرىلىس كومپانياسى موينىنا العان. عيمارات باسشىسى ءدال وسىنداي مانەردەگى نىسان ءبىرىنشى رەت سالىنىپ جاتقاندىقتان، ونىڭ بارلىق قىر- سىرىنا، كليمات پەن اۋا رايى جاعدايىنا، دالا جەلى مەن وزگە دە فاكتورلارعا باسا ماڭىز بەرىلگەنىن ايتادى.
«استانادا قاراشا ايى باستالعاننان كەيىن بىردەن اياز ءتۇسىپ كەتەدى. وسى سەبەپتى، بەتون ءبىرىنشى قاتىپ قالا ما دەگەن قاۋىپ بولعان. سوندىقتان، جۇمىسشىلار اسا قۋاتتى وتتىقتاردى پايدالانا وتىرىپ، بەتون جىلى كۇيدە ساقتالۋ ءۇشىن ەرەكشە قالىپتا جۇمىس ىستەي باستادى. مىنە، وسىلايشا جۇمىس قارقىنى باسەڭدەپ قالعان كەزدەر بولعان. شاتىردىڭ ءسۇمبىسىن قالاي ورناتۋعا بولادى دەگەن سۇراق بويىنشا ءبىرشاما باس قاتىردىق. اقىرى، الەمنىڭ تۇكپىر- تۇكپىرىنەن بىلىكتى مامانداردى شاقىرىپ، بىرلەسە جۇمىس اتقارۋعا تۋرا كەلدى. ءبىر باعان جەتكىلىكسىز بولعاندىقتان، تاعان ورناتۋ دۇرىس دەپ شەشىلدى. بۇل جۇمىس جوبانىڭ ەڭ كۇردەلى تۇسى بولدى دەسە دە بولادى. اياز كەزىندە تاعاندى ورناتۋ، ETFE جابىندىسىن مونتاجداۋ، سونىمەن بىرگە ۋاقىت تىم از قالعاندىقتان، مەرزىمىندە جۇمىستى اياقتاۋ استە وڭايعا تۇسكەن جوق» ، - دەيدى ول.
وتكەن كۇندى ەسكە تۇسىرە وتىرىپ، ەنگين اسرالان قۇرىلىس مەرزىمىنە قاتىستى تاعى ءبىر ەستەلىگىمەن ءبولىستى. ءاۋ باستا قۇرىلىسشىلار جۇمىستى ەكى جىلدا ەڭسەرەمىز دەگەن ەكەن. الايدا ويلاماعان جەردە پايدا بولعان كۇردەلى جايلار، اۋا رايىنىڭ سالدارى ءوزىنىڭ اسەرىن تيگىزىپ، قۇرىلىس 4 جىلعا سوزىلىپ كەتكەن.
اسرالان مىرزا ساۋدا ورتالىعىنىڭ ەرەكشە ساۋلەتى تۋرالى اڭگىمەسىن جالعاستىردى.
«نىساننىڭ «قاڭقاسى» - جارىق وتكىزگىش بىرەگەي ماتەريالداردان، ۇساق تورلاردان تۇراتىن ءىرى شاتىر. كۇمبەزدىڭ ءۇشقاباتتى جابىندىسى استانانىڭ قۇبىلمالى اۋا رايىنا شىدامدى بولىپ كەلەدى. سەبەبى، ەلوردادا ءوزىڭىز بىلەتىندەي، اۋا تەمپەراتۋراسى +35 گرادۋسقا دەيىن ىسيدى دا، قىستىگۇنى -40 گرادۋسقا دەيىن سۋيدى. كۇمبەز كۇن ساۋلەسىن جۇتىپ الىپ، نىساننىڭ ىشىنە جاز مەزگىلىنىڭ جاي- كۇيىن، لەبىن تاراتا الاتىنداي ETFE ارنايى ماتەريالىنان جاسالعان. تەنتتىڭ جالپى اۋدانى 10 فۋتبول ستاديونىنان دا كەڭ. قۇرىش ۆانتتىڭ جەلىسىنەن جاسالعان قۇرىلىمدى شاتىرعا اشىق پوليمەرلى ETFE جابىندىسى بەكىتىلگەن» ، - دەيدى ەنگين اسرالان.
ساۋدا ورتالىعىنىڭ قۇرىلىسىنداعى وزگەشەلىكتى تىلگە تيەك ەتە كەلە «حان شاتىر» - كەزىندە «Forbes Style» جۋرنالى ءوزىنىڭ حيت- پارادىنا ەنگىزگەن تمد ىشىندەگى بىردەن- ءبىر عيمارات ەكەنىن ايتا كەتۋ كەرەك. سونىمەن قاتار، 2010 -جىلى «حان شاتىر» قازاقستان رەسپۋبليكاسى پرەزيدەنتىنىڭ «التىن ساپا» سىيلىعىن «شاعىن جانە ورتا بيزنەس سالاسىنداعى قىزمەت كورسەتۋ بويىنشا ۇزدىك كاسىپورىن» نوميناتسياسىن ۇتىپ العان.
قازىرگى تاڭدا «حان شاتىر» Zara, New Yorker، Mexx, Bershka, Mango, LC Waikiki, Mondial, Adidas, Massimo Dutti, Nike, Reebok جانە وزگە دە الەمدىك برەندتەردىڭ تاۋارلارىن ۇسىنادى. «حان شاتىردىڭ» تاعى ءبىر ەرەكشەلىگى - ونىڭ ىشىندە ساۋدا ورتالىعىنىڭ ەڭ بيىك جەرىندە ورنالاسقان «Sky Beach Club» جابىق جاعاجايى جۇمىس ىستەپ تۇر.
ورتالىقتىڭ اكىمشىلىگىنەن حابارلاعانداي، جاعاجايعا قۇم مالديۆ ارالدارىنان ارنايى اكەلىنەتىن كورىنەدى. دەمالىس كۇندەرى «حان شاتىرعا» ورتاشا ەسەپپەن 30 مىڭ ادام كەلەدى. ال جالپى عيمارات «قازاق ەلى» مونۋمەنتى مەن بەيبىتشىلىك جانە كەلىسىم سارايى، «اق وردا» مەن «بايتەرەك» ارقىلى كوزگە كورىنبەيتىن سىزىقتى بەكىتىپ، استاناعا ەرەكشە كورىك بەرىپ تۇر.
