زاعيپا باليەۆا دەپۋتاتتاردىڭ الدىنا سۋيتسيد جاساماق بولعان قىزدى الىپ كەلدى
«بۇگىن ءبىر قىز وسى جەرگە كەلۋگە نيەت تانىتتى. ول بەتپەردەدە بولادى جانە مۇنداي قادامعا قالاي بارعانىن ايتىپ بەرەدى. ونى تىڭداۋىمىز كەرەك. ويتكەنى، كوپتەگەن سەبەپتەرى بار ەكەن. ءبىز بالاعا جىلۋ بەرىپ، كيىندىرىپ، قارنىن تويدىرامىز دا، وسى جەتكىلىكتى دەپ ويلايمىز. الايدا، بالانىڭ جانىن قاپەرىمىزدەن شىعاردىق. كىشكەنتاي بالا مۇنداي قادامعا بارار كەزدە قالاي دەسەك تە ءومىر جايىندا ويلايدى. ول ءبىزدىڭ «111» تەلەفونىمىزعا قوڭىراۋ شالدى جانە پسيحولوگتار ەكى ساعات بويى ونىمەن جۇمىس ىستەدى. قازىر ول وزىنە قول جۇمساماعانى ءۇشىن بىزگە العىسىن ايتادى. ويتكەنى، ۇيىندە اناسى، تۋعان-تۋىستارى، جاقىندارى بار. بۇل بارلىق اتا-انالار ءۇشىن، ءبىز ءۇشىن ۇلگى ءارى ساباق بولۋى قاجەت شىعار. وعان تەك ويىنشىق، كيىم جانە ءبىلىم عانا كەرەك ەمەس. وعان ەڭ ءبىرىنشى كەزەكتە، سۇيىسپەنشىلىك، جىلۋلىق، ورتاقتاستىق جانە تىرەك قاجەت»، - دەدى ول ءماجىلىس دەپۋتاتتارى الدىندا قازاقستاننىڭ بالا قۇقىقتارى جونىندەگى ۋاكىلى وتكەن جىلدىڭ ىشىندە اتقارعان قىزمەتتەر جايىندا بايانداي كەلە.
ونىڭ ايتۋىنشا، ەل ۇكىمەتىنىڭ قولداۋىمەن «111» جەدەل قىزمەت قۇرىلىمى قۇرىلىپ، ەكى جىلدىڭ ىشىندە نىعايا تۇسكەن.
«وسىناۋ سەنىم تەلەفونى تاياۋ ارالىقتا ا ق ش-تاعى «911» تەلەفونى سياقتى بولارىنا ءۇمىت ارتامىن. ويتكەنى، بىزگە تەك بالالار عانا حابارلاسپايدى. ءتىپتى كەيبىر ارىپتەستەر كوپتەگەن تەلەفوننىڭ ىشىنەن «111» ءنومىرى عانا بىردەن جاۋاپ بەرگەن جاعدايلارعا تاپ بولعان. ونىڭ ارقاسىندا ادامنىڭ ءومىرى قۇتقارىلدى»، - دەدى زاعيپا باليەۆا.
ۋاكىلدىڭ دەرەگىنشە، 2017 -جىلى «111» سەنىم تەلەفونى 104 بالانى سۋيتسيدتەن قۇتقارعان.
