الەۋمەتتىك جەلىدە تاراعان اقپارات: استانادا جولاقى قىمباتتاي ما
ايتا كەتەيىك، كەشە، 30 -مامىر كۇنى الەۋمەتتىك جەلىلەر مەن مەسسەندجەرلەردە 2018 -جىلدىڭ 1 -ماۋسىمىنان باستاپ ەلوردادا قوعامدىق كولىكپەن ءجۇرۋ قۇنى قىمباتتايتىندىعى تۋرالى حابارلامالار تاراتىلادى باستادى.
«اتالمىش اقپارات جالعان، شىندىققا جاناسپايتىنىن حابارلايمىز. تاريفتەردى كوتەرۋ تۋرالى شەشىم قالا بيلىگىمەن قابىلدانادى. بۇل پروتسەستىڭ ءوزى بەلگىلى ءبىر ۋاقىتتى قاجەت ەتەدى. جانە جاڭا تاريفتەر بەكىتىلگەن جاعدايدا قالا تۇرعىندارى مەن قوناقتار بۇل تۋرالى بۇقارالىق اقپارات قۇرالدارى جانە رەسمي دەرەككوزدەر ارقىلى حابارلاندىرىلاتىن بولادى»، - دەپ جازدى فەيسبۋكتە قالا اكىمىنىڭ باسپا ءسوز حاتشىسى ەلۆيرا جۇرگەنبايەۆا.
اتاپ وتىلگەندەي، اۆتوبۋستاردا جولاقى بۇرىنعىشا - 90 تەڭگە جانە ەكسپرەسس- مارشرۋتتاردا 150 تەڭگە بولىپ قالادى.
ەسكە سالايىق، بۇگىندە استانادا اۆتوبۋسپەن ءجۇرۋ قۇنىن كوتەرۋ ماسەلەسى قارالىپ جاتىر. اتاپ ايتقاندا، «Astra Plat» ەلەكتروندى تولەم كارتاسى بويىنشا جولاقى باعاسىن - 120 تەڭگەگە، ال قولما-قول اقشامەن 170-200 تەڭگەگە ارتتىرۋ جوسپارلانعان.
بۇل قىزمەت ساپاسىن ارتتىرۋ، كولەڭكەلى اينالىمدى تومەندەتۋ، اۆتوبۋستاردى كۇتۋ ۋاقىتىن ازايتۋ جانە اۆتوبۋستار پاركىن جاڭارتۋ ءۇشىن جاسالۋدا.
«جالپى، جول ءجۇرۋ باعاسىن كوتەرۋدىڭ باستى فاكتورى ديزەلدىك وتىن باعاسىنىڭ 40 پايىزعا، قاجەتتى قۇرال-جابدىقتاردىڭ باعاسى 2014 -جىلمەن سالىستىرعاندا 1,5-2 ەسەگە (سول كەزدە باعا 90 تەڭگە بولىپ بەكىتىلگەن) قىمباتتاۋى بولىپ وتىر. بۇعان قوسا اۆتوبۋس پاركتەرى قىزمەتكەرلەرىنىڭ ايلىق تولەماقى دەڭگەيىن ارتتىرۋ قاجەتتىلىگىنىڭ دە اسەرى بار. قازىرگى تاريف بويىنشا ونى جۇزەگە اسىرۋ مۇمكىن ەمەس. مىناعان نازار اۋدارا كەتۋ كەرەك: اتالعان اقپارات كەلىسىلۋ ساتىسىندا جانە جۋىق ارادا قوعامدىق كەڭەس پەن قالالىق ءماسليحات دەپۋتاتتارىنىڭ قاراۋىنا جولدانادى. دەپۋتاتتاردىڭ وي- پايىمىنىڭ ەسەبىمەن تۇپكىلىكتى شەشىم قابىلدانادى»، - دەگەن بولاتىن «استانا LRT» ج ش س باسقارما ءتوراعاسى بەكمىرزا يگەنبەردينوۆ.
