استانادا ءۇش اي بويى «الپامىس» تەاترلاندىرىلعان مەگا-شوۋى قويىلادى
قويىلىمعا ءار ەلدەن 70 ءارتىس قاتىسادى، دەپ حابارلايدى قازاقپارات ءتىلشىسى.
قازاقستان رەسپۋبليكاسى مادەنيەت جانە سپورت مينيسترلىگىنىڭ ۇيىمداستىرۋىمەن «الپامىس» اتتى ەرەكشە تەاترلاندىرىلعان سيركتىك شوۋ بولادى. ايتۋلى شارا استانانىڭ 20 جىلدىعىنا وراي استانادا ەتنوۋىل كەشەنىندە وتەدى. قازىر مۇندا شوۋعا ارنالعان الاڭدى جابدىقتاۋ جۇمىستارى اياقتالۋعا جاقىن. كورەرمەن زالىنا 1000 ادام جايعاسا الادى.
«قازاق اۋەندەرى» ا ق ۆيتسە-پرەزيدەنتى ساكەن شاكەيەۆ ءوز سوزىندە: «شوۋ «رۋحاني جاڭعىرۋ» باعدارلاماسىنىڭ اياسىندا قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن وتەدى. بيىل استانانىڭ 20 جىلدىعى، وسى مەرەيتويعا وراي قالا تۇرعىندارى مەن قوناقتارىنا، ەرەكشە اسەر بەرەتىن «الپامىس» تەاترالدى-سيرك شوۋىن سىيعا تارتپاقپىز. قازاق تاريحىنىڭ ەڭ كونە جانە جۇمباق بەتتەرىنەن باستاۋ الاتىن الپامىس باتىر تۋرالى عاجاپ اڭىزدىڭ جەلىسى ەجەلگى بوزوق قالاسىنىڭ كوشەلەرى مەن الاڭدارىندا وتەدى. قويىلىمعا كورەرمەن نازارىنا اۋە گيمناسشىلارىنا ارنالعان بىرەگەي اسپالار، سۋبۇرقاقتارى، ارنايى ەففەكتىلەرى مەن بىرەگەي دەكوراسيالارى بار جوعارى تەحنولوگيالى ساحنا ۇسىنىلادى، - دەپ اتاپ ءوتتى.
الپامىس جىرى قازاق مادەنيەتى مەن تاريحىنىڭ كوپ عاسىرلىق جاۋھارىن جيناقتاعان. ۇلى حالىق پەن ەجەلگى كەرەمەت قالانىڭ اڭىزعا اينالعان وتكەن كۇنى تۋرالى شوۋدى اۋقىمدى تەاترالدى- سيرك كورسەتىلىمدەرىنە مامانداندىرىلعان، كوپتەگەن حالىقتىڭ اڭىزدارى مەن ميفتەرىنە جاڭا ءومىر سىيلاپ جۇرگەن «جۋراۆلي» سپورت تەاترى قويادى.
شوۋ پروديۋسەرى جانە رەجيسسەرى سەرگەي كوزيننىڭ ايتۋىنشا، ولار استانا تۇرعىندارى مەن قوناقتارىنا ەستەن كەتپەس قويىلىم ازىرلەپ وتىر. «كاسىبي اكروباتتار، تاماشا كوستيۋمدەر، جارقىن كورسەتىلىم، كەرەمەت دەكوراتسيا، اۆتورلىق مۋزىكا - وسىنىڭ ءبارى جاندى ەلىتەر، قايتالانباس شوۋ جاسايدى».
«الپامىس» قويىلىمىنا ءار ەلدەن 70 ءارتىس قاتىسادى. ولاردىڭ بارلىعى حالىقارالىق سيرك بايقاۋلارىنىڭ لاۋرەاتتارى مەن جوعارى دەڭگەيدەگى سپورت سايىستارىنىڭ جەڭىمپازدارى، Du Soleil سيركى قويىلىمدارىنىڭ تاجىريبەلى قاتىسۋشىلارى.
اڭىزدىڭ باس كەيىپكەرى الپامىستىڭ ءرولىن سومداۋشى دارحان قامبىشەۆ ءوز اسەرىمەن ءبولىستى: «مۇنداي كەرەمەت شوۋعا قاتىسۋ جانە ەڭ جوعارى دەڭگەيدەگى كاسىبي ماماندارمەن جۇمىس ىستەۋ مەن ءۇشىن ۇلكەن مارتەبە. اسىرەسە شوۋدىڭ استانامىزدىڭ 20 جىلدىعىنا وراي ءوتۋى جانىمدى تەربەيدى».
«الپامىس» تەاترالدى-سيرك شوۋى 1 -ماۋسىمنان 31 -تامىزعا دەيىن بەيسەنبى مەن جەكسەنبى ارالىعىندا ەلورداداعى «ەتنواۋىل» ۇلتتىق- مادەني كەشەنى اۋماعىندا وتەدى.
داۋلەت ىزتىلەۋ
