مينيستر مۇحامەدي ۇلى ەسلياموۆا مەن دۆورسەۆوي تۋرالى: شىعارماشىلىق تاندەم ءوز جەتىستىگىن قايتالادى

«71-كانن فەستيۆالىنىڭ حالىقارالىق قازىلار القاسى ۇزدىك ايەل ءرولى اتالىمىن قازاقستاننىڭ تۋماسى سامال ەسلياموۆاعا بەردى. سامال مەملەكەتتىك تەاتر ونەرى ينستيتۋتىندا وقىعان. 2008 -جىلى ول قاتىسقان العاشقى فيلم «قىزعالداق» («تيۋلپان») رەجيسسەر سەرگەي دۆورسەۆويدى جەتىستىككە جەتكىزدى. وڭتۇستىك قازاقستان وبلىسىندا، بەتپاقدالادا تۇسىرىلگەن سول كارتينا كانن فەستيۆالىنىڭ ماڭىزى جاعىنان ەكىنشى ورىندا تۇراتىن «ەرەكشە كوزقاراس» گران- ءپريىن جەڭىپ الدى»، - دەپ جازدى مينيستر فەيسبۋكتەگى پاراقشاسىندا.

ونىڭ ايتۋىنشا، «ايكا» فيلمىن تۇسىرۋگە ءتۇرلى ەلدەردىڭ 5 كينوكومپانياسى قاتىسقان.

«اراعا تۋرا 10 جىل سالىپ، دۆورسەۆوي مەن ەسلياموۆا «ايكا» فيلمى جەتىستىگىن قايتالادى. ونى 5 كينوكومپانيا: سەرگەي دۆورسەۆويدىڭ «كينودۆور» ستۋدياسى، سونداي-اق گەرمانيا، پولشا، قىتاي جانە قازاقستان كينوكومپانيالارى ءتۇسىردى. شىعارماشىلىق تاندەمدى قۇتتىقتايمىن! سىزدەرگە تابىس، جاڭا جەڭىستەر تىلەيمىز!»، - دەدى ا. مۇحامەدي ۇلى.

ەسكە سالا كەتەيىك، قازاقستاندىق اكتريسا سامال ەسلياموۆا 71 -كانن كينوفەستيۆالىندە ءوز اتالىمى بويىنشا ۇزدىك دەپ تانىلعان بولاتىن.

«ايكا» اتتى كينوتۋىندىدا قىرعىزستاننان ماسكەۋگە زاڭسىز كەلىپ، تۇرىپ جاتقان ميگرانت قىزدىڭ ءومىرى سۋرەتتەلەدى. ونداعى باستى ءرولدى سامال ەسلياموۆا سومدايدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى