ورالداعى شاعىن اۋدانعا قادىر مىرزا ءاليدىڭ ەسىمى بەرىلدى
وبلىستىق تىلدەردى دامىتۋ باسقارماسىنان تۇسكەن مالىمەتكە قاراعاندا، بۇل جونىندە ق ر ۇكىمەتى جانىنداعى رەسپۋبليكالىق ونوماستيكا كوميسسياسىنىڭ وڭ قورىتىندىسى شىقتى.
سونىمەن قاتار وسى شاعىن اۋدانداعى جاڭا الاڭ قازاقستان رەسپۋبليكاسىنىڭ تۇڭعىش پرەزيدەنتى الاڭى بولىپ اتالاتىن بولدى. تاعى ەكى شاعىن اۋدان «كوكجيەك» پەن «سارىارقا» ، رەمزاۆود اۋدانىنداعى سكۆەر «چەرنوبىل» اپاتىنىڭ سالدارىن جويۋشىلار» اتاۋىن الدى.
وعان قوسا قالاداعى جاڭا كوشەلەرگە تانىمال تۇلعالاردىڭ ەسىمدەرى مەن ۇيلەسىمدى اتاۋلار بەرىلدى. «قازاقستان رەسپۋبليكاسىنداعى ءتىل تۋرالى» زاڭىنىڭ 25-5-بابىندا كورسەتىلگەن كريتەرييلەرگە سايكەس كەلمەيتىن كوشەلەر اقىندار، ۇلى وتان سوعىسىندا ەرلىكپەن قازا تاپقان ابدوللا جۇماعاليەۆ، سونداي- اق وتكەن جىلى 100 جىلدىعى تويلانعان ساعىنعالي سەيىتوۆ، بەلگىلى جىرشى- تەرمەشى، قازاقستاننىڭ ەڭبەك سىڭىرگەن ءارتىسى قالامقاس وراشيەۆا، تارازى، شولپان، جەتى قاراقشى، بەكەت اتا، قىزىر بابا ەسىم- اتاۋلارىن الدى. بارلىعى 91 كوشە جاڭادان اتالدى.
«ەندى رەسپۋبليكالىق ونوماستيكا كوميسسياسىنىڭ قورىتىندىسى نەگىزىندە الداعى مامىر ايىندا وتەتىن سەسسيادا قالا اكىمدىگى مەن قالالىق ءماسليحاتتىڭ بىرلەسكەن شەشىمى قابىلدانادى» ، دەپ حابارلادى باسقارمادان.
ەسكە سالا كەتەيىك، ورالداعى قازاق تەاترىنا حاديشا بوكەيەۆانىڭ، مادەنيەت ورتالىعىنا قادىردىڭ ەسىمى رەسمي تۇردە بەرىلگەنىن بۇدان بۇرىن جازعان بولاتىنبىز.
