جەكەشەلەندىرۋدەن كەيىنگى باقىلاۋدى كۇشەيتۋ قاجەت - مينيستر
«جەكەشەلەندىرۋدەن كەيىن كاسىپورىننىڭ ءارى قارايعى قىزمەتىنە باقىلاۋ جۇرگىزىلۋى كەرەك. سەبەبى، وبەكتىلەردى ساتقان كەزدە ساتۋدىڭ جەكەلەگەن شارتتارى ايقىندالۋى مۇمكىن. مىسالى، قىزمەتتىڭ پروفيلىن ساقتاۋ؛ جاڭا جۇمىس ورىندارىن قۇرۋ نەمەسە ساقتاۋ؛ بورىشتى وتەۋ؛ تابيعات قورعاۋ شارالارىن جۇزەگە اسىرۋ؛ جەكەشەلەندىرۋ وبەكتىسىنە قۇيىلاتىن ينۆەستيتسيا كولەمىن، تۇرلەرى مەن مەرزىمدەرىن بەلگىلەۋ جانە ت. ب.»، - دەپ اتاپ ءوتتى مينيستر سۇلەيمەنوۆ ۇكىمەت وتىرىسىندا.
ءمينيستردىڭ ۇسىنىسىنا سايكەس، جەكەشەلەندىرۋدەن كەيىنگى باقىلاۋ جەكە مەنشىك يەلەردىڭ وبەكتىنى باسقارۋ تيىمدىلىگىن انىقتاۋ ءۇشىن باسەكەلەستىك ورتاعا بەرگەننەن كەيىن 3-5 جىلدان سوڭ جۇزەگە اسىرىلۋى ءتيىس جانە بۇل باقىلاۋ كۆازي مەملەكەتتىك سەكتوردا دا جۇرگىزىلۋى ءتيىس.
«جەكەشەلەندىرۋدەن كەيىنگى باقىلاۋ تەك مەملەكەتتىك مەنشىك اكتيۆتەرى بويىنشا جۇزەگە اسىرىلادى. كۆازيمەملەكەتتىك سەكتوردىڭ ساتىلعان اكتيۆتەرى بويىنشا باقىلاۋ جۇزەگە اسىرىلمايدى. وسىعان بايلانىستى، ۇلتتىق حولدينگتەرگە ساتۋ شارتتارىنىڭ ورىندالۋىنا جانە تۇتاس كومپانيا قىزمەتىنىڭ تيىمدىلىگىنە جەكەشەلەندىرۋدەن كەيىنگى باقىلاۋدى قامتاماسىز ەتۋدى ودان ءارى ورىنداۋدى تاپسىرۋ قاجەت»، - دەپ ءوز ءسوزىن تۇيىندەدى ت. سۇلەيمەنوۆ.
سونىمەن بىرگە، ۇلتتىق ەكونوميكا ءمينيسترى جەكەشەلەندىرۋ وبەكتىلەرىنىڭ نەگىزىنەن ەكىنشى جانە ءۇشىنشى ساۋدا-ساتتىقتاردا ساتىلاتىندىعىن، ولاردىڭ باستاپقى باعاسى الدىڭعى باعاسىنان 50 پايىزعا تومەندەپ، مەملەكەتكە شىعىن كەلەتىنىن باسا ايتتى.
