ماقسۇت جۇمايەۆ تاعى دا «جەر شارىنىڭ جوتاسىنا» شىقپاق - فوتو
ەكسپەديتسيا استانانىڭ 20 جىلدىعىنا ارنالادى. ءبىرىنشى رەت ول چومالاڭمانى (تيبەت تاۋىنداعى ەڭ بيىك نۇكتە) 2007 -جىلى باعىندىرعان ەدى.
ايتا كەتەيىك، جۇمايەۆ - الەمدەگى ەڭ بيىك شىڭدى باعىندىرعان 14 ادامنىڭ ىشىندە جالعىز قازاق. «ەۆەرەستكە باراتىن ەكى باعىت بار - سولتۇستىك جانە وڭتۇستىك جاعى. 2007 -جىلى مەن سولتۇستىك جاعىنان باردىم، بۇل جولى وڭتۇستىكتەن كوتەرىلەتىن بولامىز. الەمدە شامامەن 10 عانا الپينيست بار شىعار ەكى جاعىنان دا شىققان. وڭتۇستىك جاعى قيىنىراق ءارى قاۋىپتى. باستى قاۋىپ - كحۋمبۋ مۇزدىعى - وندا الىپ مۇز سەڭى كوپ، ولار كۇنىنە ءبىر مەترگە ءوسىپ وتىرادى. بۇل الەمدەگى ەڭ جىلجىمالى ءارى ەڭ قاۋىپتى باعىت.
سونىمەن قاتار، بۇل باعىتپەن سەگىزمىڭدىقتىڭ لحوتسزە مۇز قابىرعاسى ءوتىپ جاتىر - بۇل دا وتە قاۋىپتى ايماق. وڭتۇستىكتە الپينيستەر توقتاپ، دەمالاتىن بازالىق لاگەرلەر دە از جانە بەيىمدەلۋ تىم باياۋ جۇرەدى»، - دەيدى الپينيست.
وسىعان دەيىن جۇمايەۆ 2011 -جىلى الەمدەگى ەڭ بيىك نۇكتە بويىنشا ەكىنشى ورىنداعى - ك2 شىڭىنا شىققان ەدى.
«وسىدان كەيىن مەن سپورتتىق مانسابىمدى اياقتاپ، ۋاقىتىمدى وتباسىم مەن ارميانىڭ ورتالىق سپورت كلۋبىنداعى (س س ك ا) جۇمىسىما ارنادىم. جارتى اي بۇرىن ماعان رەسەيدەگى تانىستارىم حابارلاسىپ، ەۆەرەستكە شىعۋعا كومەكتەسۋدى سۇرادى. ەۆەرەست شىڭىندا قازاقستان تۋىنان باسقا قازاقستان قارۋلى كۇشتەرىنىڭ تۋىن تىگۋ جوسپارلانعان، سەبەبى قورعانىس مينيسترلىگى جوسپارلانعان ەكسپەديتسياعا قولداۋ ءبىلدىرىپ وتىر»، - دەيدى الپينيست.
«شىڭدى باعىندىرۋدىڭ تاعى ءبىر سەبەبى - قازاقستان استاناسىنىڭ مەرەيتويى. بيىل استانا قالاسىنا 20 جىل تولادى. وسى ورايدا ءبىز الەمنىڭ ەڭ بيىك نۇكتەسىنە ەلىمىزدىڭ تۋىن تىگۋدى جوسپارلاپ وتىر. سونىمەن قاتار، بيىل ەكى قازاقستاندىقتىڭ ەۆەرەستكە شىعاتىنىن ايتقىم كەلەدى. باسقا ءبىر كوماندادا ءبىزدىڭ وتانداسىمىز اسەت دانيالوۆ بولادى. ءوزىمنىڭ نەگىزگى جۇمىسىم حالىقارالىق ەكسپەديتسيادان بولەك، مەن ارينە وعان دا كومەكتەسەتىن بولامىن. ەۆەرەستتى باعىندىرۋ - بۇل وتە قيىن ءىس. ونىڭ شىڭىنا شىققاندا ەيفوريا نەمەسە قۋانىشتى سەزىنە المايسىڭ، ونىڭ ورنىنا قاتتى شاراشعانىڭدى جانە مورالدىق تۇرعىدان دا قيىندىقتار بولادى. ءۇش جاعدايدىڭ ەكەۋىندە تومەن ءتۇسۋ كەزىندە الپينيستەر قازا تاۋىپ جاتادى، سەبەبى بار كۇش جىگەرىن كوتەرىلۋگە جۇمسايدى: الپينيست بازالىق لاگەرگە تۇسپەيىنشە ول شىڭعا شىققان بولىپ ەسەپتەلمەيدى»، - دەيدى جۇمايەۆ.
ءوز كەزەگىندە، استانا قالالىق مادەنيەت جانە سپورت باسقارماسىنىڭ باسشىسى بولات ماجاعۇلوۆ ەۆەرەستكە شىعۋ ەكسپەديتسياسىنا ارنالعان باسپا ءسوز ءماسليحاتىندا ءسوز سويلەپ، ەلگە امان- ەسەن ورالۋىن تىلەدى.
«ەلوردالىق اكىمدىك پەن مادەنيەت جانە سپورت باسقارماسىنىڭ اتىنان ماقسۇتقا استانانىڭ 20 جىلدىعىنا ارناپ، ەۆەرەستكە شىعۋ شەشىمىن قابىلداعانى ءۇشىن العىس بىلدىرەمىن. بۇل قالامىزدىڭ ابىرويىنا الەمدىك دەڭگەيدە اسەرىن بەرەتىنى ءسوزسىز. ساتتىلىك تىلەپ، ۇيىنە امان-ەسەن ورالۋىن تىلەيمىن»، - دەدى بولات ماجاعۇلوۆ. 13 -ساۋىردە ەكسپەديسيا مۇشەلەرى نەپال استاناسى كاتماندۋ قالاسىنا ۇشىپ بارادى.
