اتا-انالار مۇنى دۇرىس تۇسىنۋگە ءتيىس - نازاربايەۆ مەكتەپتەردەگى ۇشتىلدىلىك جايلى
كەزدەسۋدە مەملەكەت باسشىسىنا ءبىلىم بەرۋدى جانە عىلىمدى دامىتۋدىڭ 2016-2019 -جىلدارعا ارنالعان مەملەكەتتىك باعدارلاماسىنىڭ ىسكە اسىرىلۋ بارىسى جونىندە ەسەپ بەرىلدى. نۇرسۇلتان نازاربايەۆ ءبىلىم بەرۋ جۇيەسى ەلىمىزدەگى ساياسي، ەكونوميكالىق جانە الەۋمەتتىك رەفورمالاردى جۇزەگە اسىرۋ ىسىندە ەرەكشە ءرول اتقاراتىنىن اتاپ ءوتتى.
«ءبىز ىسكە اسىرىپ جاتقان بارلىق باعدارلامالىق قۇجاتتاردا، سونىڭ ىشىندە قازاقستان حالقىنا ارنالعان «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى بيىلعى جولداۋ مەن «رۋحاني جاڭعىرۋ» باعدارلاماسىندا، سونداي-اق تسيفرلاندىرۋ بارىسىندا ءبىلىم بەرۋ ىسىنە زور ءمان بەرىلگەن. مەكتەپتەگى ءبىلىم بەرۋدىڭ ساپاسى وسى باستامالاردىڭ تابىستى جۇزەگە اسىرىلۋىنىڭ كەپىلى بولىپ سانالادى»، - دەدى قازاقستان پرەزيدەنتى.
مەملەكەت باسشىسى ەلىمىزدىڭ ءبىلىم بەرۋ جۇيەسىندەگى رەفورمالاردىڭ ۋاقتىلى جۇرگىزىلىپ جاتقانىن ايتىپ، جەكەلەگەن پاندەردى اعىلشىن تىلىندە وقىتۋعا كوشۋ ۇدەرىسىنە ەرەكشە توقتالدى.
«پاندەردى اعىلشىن تىلىندە وقىتۋ جوعارى سىنىپ وقۋشىلارى اراسىندا جۇرگىزىلەدى. بالالارعا اعىلشىن ءتىلىن قازىر ۇيرەتپەسەك، كەلەشەكتە ولاردان كاسىبي ماماندار دايارلاي المايمىز. بۇل ۋاقىت تالابى. اتا-انالار مۇنى دۇرىس تۇسىنۋگە ءتيىس. بۇل رەتتە، قازاق ءتىلىن وقىتۋدى دا ۇمىتپاۋىمىز كەرەك»، - دەدى ەلباسى.
كەزدەسۋدە ءبىلىم جانە عىلىم ءمينيسترى مەملەكەتتىك جانە سالالىق باعدارلامالار اياسىندا مينيسترلىك الدىنا قويىلعان مىندەتتەردىڭ ورىندالۋ بارىسى جونىندە مالىمدەدى. ەرلان ساعاديەۆ مەكتەپكە دەيىنگى ءبىلىم بەرۋ جۇيەسىن جەتىلدىرۋ باعىتىندا اتقارىلىپ جاتقان جۇمىستىڭ ارالىق ناتيجەلەرى جونىندە باياندادى.
«2018 -جىلى مەكتەپكە دەيىنگى ءبىلىم بەرۋمەن قامتۋ كورسەتكىشى 95 پايىزعا جەتەدى. نەگىزىنەن، بۇل جەكە بالاباقشالار قۇرىلىسىنىڭ ەسەبىنەن جۇرگىزىلىپ وتىر. 2019 -جىلدان باستاپ ەرتە جەتىلۋدىڭ ءبىرىڭعاي ستاندارتتارى ەنگىزىلەدى. سونداي-اق، بالاباقشا كەزەگىنە موبيلدىك قۇرىلعىلاردى قولدانۋ ارقىلى دا تۇرۋعا بولاتىنىن ايتىپ وتكەن ءجون»، - دەدى ءبىلىم جانە عىلىم ءمينيسترى.
سونىمەن بىرگە، ەرلان ساعاديەۆ قازاقستان پرەزيدەنتىنە مەكتەپتەردى نازاربايەۆ زياتكەرلىك مەكتەپتەرىنىڭ تاجىريبەسى بويىنشا جاڭا مازمۇنعا كوشىرۋدىڭ ناتيجەلەرى جونىندە ايتتى. ءبىلىم جانە عىلىم ءمينيسترى جەكەلەگەن پاندەردى اعىلشىن تىلىندە وقىتۋ ءۇشىن مۇعالىمدەر دايارلاۋ بارىسى جونىندە مالىمدەدى.
«2016 -جىلى اعىلشىن تىلىندە 2 مىڭ عانا مۇعالىم ساباق بەرگەن بولاتىن. بىلتىر 11,5 مىڭ مۇعالىم ءتيىستى اعىلشىن كۋرسىنان وتۋگە ءوتىنىش ءبىلدىرىپ، ولاردىڭ 3 مىڭعا جۋىعى دايارلىعىن اياقتاپ، ساباق بەرۋگە كىرىستى. 8 مىڭ مۇعالىم وقۋىن جالعاستىرىپ، قاجەتتى دەڭگەيگە اۋىسۋدا. وسىلايشا، 2019 -جىلى 13,5 مىڭ مۇعالىم ءتورت ءپاندى اعىلشىن تىلىندە بەرۋدى باستايدى»، - دەدى ساعاديەۆ. كەزدەسۋ سوڭىندا نۇرسۇلتان نازاربايەۆ ءبىرقاتار ناقتى تاپسىرما بەردى.
