ورالحان بوكەي شىعارماشىلىعىنداعى ماحاببات تۋرالى افوريزمدەر
پوۆەستەرى مەن روماندارىندا ماحاببات تۋرالى كوزقاراسىن بىرىندە كەيىپكەرىنىڭ اۋزىنا سالىپ بەرسە، بىرىندە اۆتور اتىنان ايتادى. ۇزىندىلەردى وقىپ، قىزىقتىرسا، شىعارمالارىنىڭ تولىق نۇسقاسىن ىزدەپ وقىپ كورىڭىز. «ەكى باي قۇدا بولسا، اراسىندا تايپالعان جورعا جۇرەدى، ەكى كەدەي قۇدا بولسا، اراسىندا بۇلتىڭداعان دوربا جۇرەدى، ەگەر ءبىر باي، ءبىر كەدەي قۇدا بولسا، قىرجىڭداسىپ زورعا جۇرەدى» ، - دەپ وتىرۋشى ەدى ومار اقساقال. قازىر سونىڭ ءبىرى دە جۇرمەيدى جورالعىعا، ەكى جاستىڭ ماحابباتى عانا جۇرەدى.
♥ ♥ ♥
مىناۋ كەڭگىر بابامنىڭ جانىندا جەر تومپايتىپ قانا جاتقان جۇبايىڭىز گۇليانىڭ باسىنا قىزىل كىرپىشتەن قالاپ، مۇردەحانا تۇرعىزباق ويىڭىز قانداي كەرەمەت. مىنە، ەلۋ جىل وشپەگەن ماحابباتتىڭ ايعاعى.
♥ ♥ ♥
ادام بالاسىندا ءدال وسىنداي بالتالاساڭ دا، اجىراماس ماحاببات بولارىن جانە ونىڭ ماڭگىلىك ەكەنىن سوڭعى كەزدە عانا سانالاعان- دى.
♥ ♥ ♥
ماحاببات - تابيعات ءوزى بەرگەن قۇدىرەتتى سەزىم.
♥ ♥ ♥
ماحاببات ابستراكتىلى، سوندىقتان دا تەوريالىق جاعى دامي بەرەدى دە، ناقتىلى ءمانىن جوعالتا بەرمەك. نەگىزىندە، سەزىم دەگەنىمىز ادامعا عانا ءتان قاسيەت، ءبىراق ول اينىعىش. اينىعىش بولاتىن سەبەبى - ادامزات ءوزىنىڭ جاراتىلىسىنان ەش نارسەنى قاناعات تۇتقان ەمەس، ارمان مەن قيال، ءۇمىت پەن ماقسات - وسىنىڭ قاي- قايسىسى دا تەك ءبىر عانا ۇمتىلىس ۇعىمىمەن شەكتەلمەيدى، تاپقان دۇنيەڭنىڭ، شىققان بيىگىڭنىڭ ازدىعى مەن الاسالىعىن ايعاقتاپ، ۇنەمى ءبىر تىڭ، باسقا، جاڭا دا جاقسى بەلگىسىز بىردەڭەلەردى كوكسەۋمەن كۇن كەشەدى.. .
♥ ♥ ♥
وزىمنەن دە بار، حاتىمدا ابدراحماننىڭ شۇعاعا جازعان حاتىنان ولەڭ كەلتىرىپ، ءوزىم جازدىمدى اڭعارتقام. ونى سەزگەن قىز: «ولەڭ ۇرلاعان ادام ماحابباتتى دا ۇرلايدى» دەپ جاۋاپ جازىپ جىبەرىپتى.
♥ ♥ ♥
بۇل ماحاببات دەگەننىڭ ءوزى ۇستارانىڭ جۇزىندە تۇرا ما دەيمىن.
♥ ♥ ♥
جۇرەك سىرىنىڭ كىلتىن ول جوعالتىپ العان جوق، جاستىعىن دا، ماحابباتىن دا، ءومىرىنىڭ بار بازارى مەن ارمانىن دا مايدانعا الا كەتكەن جارىنا سىر ساندىعىنىڭ كىلتىنە قوسا بەرىپ جىبەرگەن ەكەن.
♥ ♥ ♥
ارمان، ماقسات، ماحاببات دەپ كەڭىردەك جىرتىپ ايعايلايسىڭدار، ال وزدەرىڭ وسىنداي قاسيەتتى ۇعىمدار ءۇشىن كۇرەسە بىلمەيسىڭدەر. مەنىڭ تۇسىنىگىمدە، قانداي دا بولماسىن ارمان مەن ماحاببات ەڭبەك ناتيجەسىندە عانا جۇزەگە اسپاق.
♥ ♥ ♥
ماحاببات دەگەن، سايىپ كەلگەندە.. . قىز بەن جىگىتتىڭ ءبىر- بىرىنە ۇزدىگە قاراۋى ەمەس، ەكى جاستىڭ ءبىر ماقساتقا بىرىگىپ قاراۋى ەكەنىن مەن ايتپاسام دا بىلەتىن شىعارسىزدار. اقىندار جانىن تەككە قينايدى، ماحاببات ولەڭگە سىيمايدى.
♥ ♥ ♥
سۇيىسكەننىڭ ءبارى ماحاببات، قۇشاقتاسقاننىڭ ءبارى ادال دوس ەمەس.
♥ ♥ ♥
ادامزاتپەن بىرگە جاراتىلىپ، ازاماتپەن بىرگە ولەتىن ماڭگى تاقىرىپ - ۇلى ماحاببات تۋرالى ميلليون رەت جازىلعان شىعار. ءبىراق ول از. جەر بەتىندە ءتورت ميللياردتان استام ادام بولسا، جەردىڭ استىندا قانشاسى.. . سولاردىڭ ءارقايسىسىندا ءوزىنىڭ دارا ماحابباتى بار ەكەن.
♥ ♥ ♥
ءبارى دە مايدان! ماحاببات دەگەنىمىز دە - ماڭگى اياقتالماس مايدان!
♥ ♥ ♥
اتامىز قازاق: «ازاپسىز ماحاببات - ارزان ماحاببات» ، - دەپ بەكەر ايتپاعان عوي.
♥ ♥ ♥
ماحاببات ول دا ءبىر باقىت قۇسى عوي. قادىرىن بىلمەسەڭ - نە ۇشىرىپ الاسىڭ، نە ءولتىرىپ الاسىڭ.
♥ ♥ ♥
شىن ارداقتىنىڭ اقىرى جوق، ونى ماڭگى جاساتۋ ادامداردىڭ اينىماس ماحابباتىنا ساياتىنىن پارىقتاي بەرمەيتىن ەدىك.
♥ ♥ ♥
اقشوقىنىڭ ۇستىنە شىعىپ الىپ: «ۋا، ايەل زاتى! سەندەر ەرلەر الدىندا ماڭگى بورىشتىسىڭدار، ول بورىشتىڭ وتەۋى - تەك قانا، ءبىر عانا ادال ماحاببات!» - دەپ جار سالعىم كەلدى.
♥ ♥ ♥
ولگىم كەلمەگەنى سەنى سۇيگەندىكتەن ەمەس، ىشتەگى كۇناسىز نارەستەنى قيماعاندىقتان.
♥ ♥ ♥
ەگەر سول بالا بۇگىندە جەر باسىپ جۇرسە، وزىڭە دەگەن ماحابباتتى ءتىرى بەينەدە كورەر ەدىڭ، ال ادامدار ابستراكتى سەزىمگە استە دە سەنبەسە كەرەك.
♥ ♥ ♥
ءبىز، جىگىتتەر، كەيدە ءوز قۇربى- قۇرداستارىمىزبەن ادال دوس بولا المايمىز، قىزدارمەن تەك جەڭىل- جەلپى سەزىم توڭىرەگىندە، ماحاببات تاقىرىبىندا بولماسا، زامان تىنىسى، ۋاقىت لەبى جايلى تولعامدى سىرلاسۋعا ورەمىز جەتە بەرمەيدى، جەتكەن كۇننىڭ وزىندە ارزان ازىلگە شاپتىرىپ جىبەرەمىز.
Massaget.kz
