دەپۋتات اسكەري وقۋ ورىندارىنداعى تاربيە جۇمىسىنا الاڭداۋشىلىق ءبىلدىردى
بۇل تۋرالى پارلامەنت ماجىلىسىندە اسكەري ءبىلىم بەرۋ تاقىرىبىنداعى ۇكىمەت ساعاتىندا پالاتانىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتوراعاسى مۇحتار ەرمان ءمالىم ەتتى، دەپ حابارلايدى قازاقپارات.
«قارۋلى كۇشتەر قىزمەتىندە اسكەري- پاتريوتتىق كلۋب جۇمىستارىن، جاستاردىڭ اسكەري قىزمەتكە دايىندىعىن ۇيلەستىرۋگە جانە قولداۋعا ايرىقشا ءمان بەرىلۋى كەرەك. وسى ورايدا، رەسپۋبليكالىق ينتەرناتسيوناليست- جاۋىنگەرلەردىڭ جانە قارۋلى كۇشتەر ارداگەرلەرىنىڭ ۇيىمدارىمەن، جاستارمەن بايلانىستى كۇشەيتۋ قاجەت. ال اسكەري ۋنيۆەرسيتەتتەردەگى تاربيە جۇمىسىنىڭ دەڭگەيى جاقسى دەپ ايتا المايمىز. باس اسكەري پروكۋروردىڭ مالىمەتى بويىنشا، 2017 -جىلدا 27 قىلمىس تىركەلدى، اتاپ ايتساق جارعىدان تىس جاعداي، پاراقورلىق، ءتىپتى كۋرسانت ءولتىرۋ وقيعالارى بار (ۇلتتىك گۆارديا ۋنيۆەرسيتەتى). 2018 -جىلى ءۇش قىلمىس تىركەلدى. وسى پروبلەماعا ەرەكشە نازار اۋدارۋ قاجەت جانە ۋنيۆەرسيتەت باسشىلارىن تىكەلەي جاۋاپكەرشىلىككە تارتۋ كەرەك»، - دەپ اتاپ ءوتتى دەپۋتات.
وسى ورايدا، ول قاتارداعى اسكەرلەردىڭ ساياسي- تاربيە جۇمىستارىندا قازىرگى زامانعا ساي ادىستەردى قولدانۋدا كورشىلەس ەلدەردىڭ تاجىريبەسىنە نازار اۋدارۋ قاجەتتىگىن ءسوز ەتتى.
«كوپ فۋنكسيونالدى اقپاراتتىق جىلجىمالى كەشەننىڭ تيىمدىلىگى زور. ول - مۋلتيمەديالىق قۇرالدارمەن جابدىقتالعان جانە دالالىق جەردە اسكەري قىزمەتشىلەر اراسىندا مادەني- كوپشىلىك جۇمىستار جۇرگىزۋگە مۇمكىندىك بەرەدى. ساراپشىلاردىڭ پىكىرى بويىنشا، جوعارى تەحنولوگيا داۋىرىندە دۇنيەگە كەلگەن جاستاردىڭ اسكەري قىزمەتىنە وڭ اسەرىن تيگىزەرى انىق. تۇتاستاي العاندا، بارلىق مۇددەلى مەملەكەتتىك ورگانداردىڭ «رۋحاني جاڭعىرۋ» باعدارلاماسىنىڭ اياسىندا ءبىرتۇتاس باعىتىن ايقىنداۋ اسكەري ءبىلىم بەرۋ مەن عىلىمدى دامىتۋدىڭ، زامان تالابىنا ساي پاتريوتتىق تاربيە بەرۋدىڭ جۇيەسىن قالىپتاستىرۋدىڭ ماڭىزدى فاكتورى بولىپ تابىلادى.
وسىعان بايلانىستى مينيسترلىك اسكەري مامانداردى دايارلاۋدىڭ تيىمدىلىگىن ارتتىرۋ ماسەلەسىن شەشۋ جانە ءبىزدىڭ قارۋلى كۇشتەردىڭ اسكەري قابىلەتىن كۇشەيتۋ ماقساتىندا عىلىمي الەۋەتتى پايدالانۋ اياسىندا بەلسەندى ۇسىنىس جاساۋى قاجەت دەپ سانايمىز»، - دەدى م. ەرمان.
