مىسىرداعى ايگىلى الەكساندريا كىتاپحاناسىندا «كوشپەندىلەر» تريلوگياسى تانىستىرىلدى - فوتو
بۇل تۋرالى قازاقپارات قر مىسىرداعى ەلشىلىگىنە سىلتەمە جاساپ حابارلايدى.
روماندى اۋدارۋ ءىسى قازاقستاننىڭ مىسىرداعى ەلشىلىگىنىڭ باستاماسىمەن قولعا الىنعان بولاتىن.
الەمدەگى ەڭ ەجەلگى ءارى ەڭ ۇلكەن كىتاپحاناداعى حالىقارالىق كىتاپ كورمەسى اياسىندا ۇيىمداستىرىلعان كەشكە، قازاق كلاسسيكاسىنىڭ شەديەۆرىن تالقىلاۋ ءۇشىن مىسىرلىق اقىندار، جازۋشىلار، سىنشىلار، تىلشىلەر مەن وقىرماندار قاۋىمى جينالدى.
كەشتىڭ اشىلۋى بارىسىندا ەلشى ارمان يساعاليەۆ «زاماناۋي قازاقستاندىق مادەنيەت جاھاندىق الەمدە» اتتى جوبانى جۇزەگە اسىرۋ قازاقستان مەن مىسىر اراسىنداعى مادەني بايلانىستاردى ارتتىرا تۇسەتىندىگىن ايتتى.
ول سوزىندە الەمدىك كلاسسيكالىق تۋىندىلاردىڭ اجىراماس بولشەگىنە اينالعان ءى. ەسەنبەرليننىڭ «كوشپەندىلەر» رومانى قازاق مادەنيەتى مەن ادەبيەتى ءۇشىن ەرەكشە ماڭىزدى ەڭبەك ەكەندىگىن اتاپ ءوتتى. تۋىندىدا 550 جىل بۇرىن قۇرىلعان قازاق حاندىعىنان كەيىنگى كەزدەردەن باستاپ، حان كەنە باسقارعان ۇلت-ازاتتىق كوتەرىلىسكە دەيىنگى قازاق حالقىنىڭ ءومىرى سۋرەتتەلەدى.
ۇلت كوشباسشىسى نۇرسۇلتان نازاربايەۆ ءى. ەسەنبەرليننىڭ ەڭبەكتەرىنىڭ اراسىندا ايگىلى «كوشپەندىلەر» رومانىنىڭ ورنى بولەك ەكەندىگىن ايتقان.
سونىمەن قاتار ارمان يساعاليەۆ ەكى اراسىنداعى مادەني بايلانىستاردى نىعايتۋ ىسىنە ءارى روماننىڭ اراب تىلىندە جارىق كورۋىنە ۇلەس قوسقان تانىمال مىسىر مەسەناتى، دوكتور حۋسەين شافيگە «قازاقستان رەسپۋبليكاسىنىڭ ديپلوماتياسىنا 20 جىل» اتتى ەستەلىك مەدالىن تارتۋ ەتتى. سونداي-اق روماندى اۋدارعان مىسىرلىق اۋدارماشى، تانات ۋنيۆەرسيتەتىنىڭ پروفەسسورى، دوكتور مۇحاممەد ريادقا روماندى اۋدارعانى ءۇشىن ق ر مادەنيەت جانە سپورت مينيسترلىگىنىڭ العىس حاتى تابىستالدى.
ءى. ەسەنبەرليننىڭ تريلوگياسىن تالقىلاۋ ىسىنە بەلسەندى ۇلەس قوسقان مىسىرلىق ادەبيەتشىلەر وعان الەمدىك كلاسسيكالىق ادەبيەتتىڭ شەدەۆرى ءارى قازاقستان تاريحىنىڭ وقۋلىعى دەگەن باعا بەردى. سىنشىلار قازاق حاندىعىنىڭ قالىپتاسۋ جىلدارىن قامتيتىن تاريحي روماننىڭ سول ۋاقىتتاعى دارا تۇلعالار مەن قازاق حالقىنىڭ دانالىعىن ونىڭ بوستاندىق جولىنداعى كۇرەسكەرلىگىن تانىتاتىندىعىن ايتتى. شاراعا قاتىسۋشىلار ءى. ەسەنبەرليندى ءتىپتى ايگىلى مىسىرلىق جازۋشى، نوبەل سىيلىعىنىڭ لاۋرەاتى ناگيب ماحفۋزبەن دە سالىستىردى.
كەشتىڭ قاتىسۋشىلارى ءى. ەسەنبەرليننىڭ ەڭبەگىندەگى وبرازداردى، باتىرلاردى قازاق حالقى ءۇشىن عانا ەمەس قاتار الەم ءۇشىن دە ۇلگى بولا الاتىندىعىن ايتتى. ۇلت-ازاتتىق قوزعالىستىڭ سيمۆولىنا اينالعان كەنەسارى حان تۋرالى كوپتەگەن اقىندار مەن جازۋشىلار ايتىپ وتكەن. ولاردىڭ اراسىندا ايگىلى فرانسۋز جازۋشىسى جيۋل ۆەرن دە بار.
سونداي-اق ايتا كەتەتىن ماسەلە تريلوگيانىڭ ءۇشىنشى ءبولىمى بويىنشا تۇسىرىلگەن «كوشپەندىلەر» فيلمى دە ەلشىلىكتىڭ باستاماسىمەن اراب تىلىنە اۋدارىلىپ، مىسىرلىق تەلەارنالاردان تاراتىلۋدا. وسى كەزدە «قازاق فيلم» كينوستۋدياسى تۇسىرگەن «قازاق حاندىعى» سەريالىن دا اراب تىلىنە اۋدارىپ، ونى اراب الەمىنە ۇسىنۋ كوزدەلىپ وتىر.
