اقتوبەدە ليفتىدە قازا بولعان جۋرناليستىڭ كۇيەۋى ادام شوشىرلىق جايدى ايتىپ بەردى
بۇگىن ايزات ءابدىساماتتىڭ كۇيەۋى قايىرجان ەرقاسىموۆ بۇقارالىق اقپارات قۇرالدارىنا سۇحبات بەردى، دەپ حابارلايدى قازاقپارات ءتىلشىسى.
«بۇكىل قازاقستاننىڭ شىندىقتى بىلگەنىن قالايمىن. اقپارات ءارتۇرلى تاراعان. مەن ايزاتتى ليفتتەن ءوزىم الىپ شىقتىم. قىزىم ءۇش جاستا. قىزىم ءبىرىنشى قاباتتان ليفتىگە كىرىپ، كەيىن ايزات كىرەدى. سول اياعىمەن كىرگەن، وڭ اياعىن ليفت ەسىگى قىسىپ قالدى. ەكىنشى قاباتتاعى ارالىقتا تۇرىپ قالعان. دەنەسى ساۋ. اياعىن جۇلىپ كەتپەدى. قىزىم ساۋ، قۇلاعان جوق. پاتەر يەلەرى كووپەراتيۆى تروسىن قاراپ، جوندەۋ جۇرگىزىلگەنىن ايتىپ جاتىر. شىن مانىندە تورستىڭ ەش قاتىسى جوق. ليفت كەدەرگى بولعان كەزدە بىردەن اشىلۋى ءتيىس. ءبىراق اشىلماعان»، - دەدى قازا بولعان جۋرناليست ايزات ءابدىساماتتىڭ كۇيەۋى قايىرجان ەرقاسىموۆ.
سوت-ساراپتاما قورىتىندىسىنا سۇيەنسەك، ايزاتتىڭ وكپەسى قىسىلىپ قالعان.
«ىشكى قۇرىلىسى، وكپەسى قىسىلىپ، اۋا جەتپەي قالعان. كەيىن ىشكى قۇرىلىسى جىرتىلىپ كەتكەن. اياعى كەسىلىپ قالعان دەگەن اقپارات شىندىققا جاناسپايدى. وقيعا ورنىندا قازا بولدى. كەمەريەۆوداعى وقيعادان سوڭ ءورت قاۋىپسىزدىگى تەكسەرىلدى، وسى جاعدايدان سوڭ ليفتتەردى قاداعالاۋ باستالادى. پاتەر يەلەرى كووپەراتيۆى نە ىستەرىن بىلمەي ءجۇر. شىن مانىندە، ءبىزدىڭ ليفت اپتاسىنا ءبىر رەت تۇرىپ قالادى. ليفت تەتىگى دۇرىس ەمەس. بىردەن اشىلمايتىنىن بۇرىننان بىلەمىز»، - دەدى ول.
ايزات ءابدىساماتتى كۇيەۋى ليفت ىشىنەن الىپ شىققان. قىزىن دا ءوزى شىعارىپ العان.
«قولىممەن الىپ شىقتىم، قان ءالى قالدى. بالامدى سول كۇنى اۋرۋحاناعا اپارىپ، تەكسەرتىپ الدىم. امان-ەسەن. تەك «مامام قىسىلىپ قالدى» دەپ ايتا بەرەدى»، - دەدى قايىرجان ەرقاسىموۆ. ونىڭ ايتۋىنشا، ليفتتە ەكى ەسىك بولعان. قايعىلى وقيعا بولعان كۇنى ونىڭ بىرەۋى جابىلماي قالعان.
«مەن جۇمىستان كەلە جاتقان ەدىم. ماعان تەلەفون شالىپ، «كۇتەمىز» دەپ ايتتى. اجالى شىعار، سول كۇنى جۇمىستان كەش شىقتىم. ەكى رەت تەمىرجول وتكەلىندە تۇرىپ قالدىم. ۇيگە جاقىنداعاندا ءبىر ادامنىڭ كولىگى توقتاپ قالعانىن كورىپ، وعان دا كومەكتەستىم. ءبىر قاراسام، ادامدار جينالىپ قالعان. نە بولدى دەپ ويلادىم. پودەزگە كىرىپ، ءبىرىنشى قاباتتان ليفتتى شاقىردىم. ىستەمەي تۇردى. «تاعى ىستەمەي قالعان» دەپ ەكىنشى قاباتقا كوتەرىلگەندە، جۇگىرىپ جۇرگەن ادامداردى كوردىم. جوعارى كوتەرىلە بەرىپ، كەرى بۇرىلدىم. سۇراعان كەزدە «جەنشينا بەز سوزنانيە، رەبەنوك پلاچەت» دەپ جاۋاپ قايتاردى. كىشكەنتاي تەسىكتەن قاراعاندا قىزىمدى كوردىم. ول مەنى كورىپ باقىرىپ جىبەردى. سول كەزدە جارىق تا بولمادى. اناسىنىڭ ءتۇرىن كورمەگەنى دە جاقسى بولعان شىعار. كوز الدىندا بولعان وقيعا ەسىندە قالاتىن شىعار»، - دەدى ول.
وقيعا ورنىنا توتەنشە جاعدايلار قىزمەتى جەتكەنشە قايىرجان ەرقاسىموۆ جانتالاسا ايەلىن قۇتقارۋعا كىرىسكەن.
«توتەنشە جاعداي قىزمەتكەرلەرى كەلگەنشە ءوزىم شىعارىپ الدىم. قاراعان كەزدە ەدەندە جاتىر دەپ ويلاعام. ءبىراق ايزات قىستىرىلىپ، ءىلىنىپ قالعان ەكەن»، - دەدى ول.
اۆتور: التىناي ساعىندىقوۆا
