اقتوبەلىك كاسىپكەرلەر جازاسىن وتەۋشىلەرمەن بىرگە ىنتىماقتاسا ەڭبەك ەتەتىن بولدى
بۇگىن ونداعان مەموراندۋمعا قول قويىلدى، دەپ حابارلايدى قازاقپارات ءتىلشىسى.
اقتوبە قالاسىندا «سەرپىن» كورمەسى وتكىزىلدى. تۇرمەدە وتىرعانداردى جۇمىسقا العان 16 كاسىپكەر اعاش، تەمىر، تەمىر-بەتوننان جاسالعان بۇيىمدار مەن كيىمدەردى ساتۋعا شىعاردى.
«اداسقاننىڭ ايىبى جوق، قايتا ۇيىرىنە قوسىلسا» دەگەن ءسوز بار. ومىردە دۇرىس قادام جاساماي، زاڭدى بۇزىپ، قىلمىسقا تارتىلىپ، جازاسىن وتەپ وتىرعان ازاماتتارعا كومەك بەرۋ كەرەك. مەملەكەت باسشىسى نۇرسۇلتان نازاربايەۆ ۇلت جوسپارىندا جازاسىن وتەۋشىلەرگە جۇيەلى تۇردە وڭالتۋ جۇمىستارىن جۇرگىزۋدى تاپسىرعان بولاتىن. ماقساتىمىز - ماماندىق بەرۋ، الەۋمەتتىك قولداۋ، جۇمىسقا ورنالاستىرۋ. اقتوبە مەن جەم قالاسىندا ارنايى ەكى كوللەدج اشىلىپ، وندا قۇرىلىسشى، گازەلەكتر دانەكەرلەۋشى، تەمىر ۇستاسى دايىندالىپ جاتىر. كۆوتامەن جۇمىسقا ورنالاستىرىپ جاتىر. جىلىنا 300 كۆوتا بەرىلۋدە»، - دەدى وبلىس اكىمى بەردىبەك ساپاربايەۆ.
اقتوبە قالاسىندا العاش رەت ۇيىمداستىرىلعان كورمە-جارمەڭكە كەزىندە كەڭسە جيھازدارى دا بولدى. سونىمەن قاتار، الماتىلىق كاسىپكەرلەر جۇمىسشىلارىنا ايىنا 20-30 مىڭ تەڭگە ءبولىپ، ارنايى كيىم تىكتىرەدى.
«سەنىمگەرلىك باسقارۋمەن جۇمىس ىستەپ جاتىرمىز. ءبىز تۇرمە ىشىندەگى سەحتى تەگىن الىپ، 25 ادامعا جۇمىس بەرىپ وتىرمىز. العاشىندا جازاسىن وتەۋشىلەرگە ماتا، كيىم تىگۋدىڭ ۇلگىسىن كورسەتەتىن بەينەماتەريال جىبەرىلدى. ولار وزدەرى مەڭگەرىپ، جۇمىس ىستەپ وتىر. ەر ادامداردىڭ قولىنان شىققان كيىمدەردىڭ ساپاسى وتە جوعارى. ولار تىگىنشى ايەلدەردەن اسىپ ءتۇستى»، - دەدى كاسىپكەر ي. پروكوپەنكو.
ءبىلىم، دەنساۋلىق ساقتاۋ، جەكە كاسىپكەرلىك سالاسىنىڭ وكىلدەرى بولىپ، 60 مەموراندۋمعا قول قويدى. اقتوبە وبلىستىق قىلمىستىق اتقارۋ جۇيەسى دەپارتامەنتى ءالى جۇمىسسىز وتىرعان 400 دەن استام جازاسىن وتەۋشى مەن پروباتسيالىق باقىلاۋداعى جۇمىسسىزداردى ەڭبەككە ارالاستىرۋدى جوسپارلاپ وتىر.
