قازاقستان قوسىلماۋ قوزعالىسىنىڭ مينيسترلىك كونفەرەنسياسىنا قاتىستى
بۇل تۋرالى قازاقپارات ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
ءىس-شاراعا قوسىلماۋ قوزعالىسىنا قاتىساتىن، سونداي-اق قوزعالىس جانىنداعى بايقاۋشىلار مارتەبەسىنە يە 91 مەملەكەت پەن حالىقارالىق ۇيىمداردان، قۇرمەتتى قوناقتار رەتىندە شاقىرىلعان ەلدەر مەن ۇيىمداردىڭ قاتارىنان 800 دەن استام وكىلدەر قاتىستى.
قازاقستان دەلەگاتسياسىنىڭ باسشىسى ءوز سوزىندە قوسىلماۋ قوزعالىسىنىڭ اۋقىمدى كۇن ءتارتىبىنىڭ ماڭىزدىلىعى مەن وزەكتىلىگىن، سونداي-اق قازاقستاننىڭ ۇستانىمدارى قوزعالىستىڭ كوپتەگەن ماقساتتارى مەن مىندەتتەرىنە سايكەس كەلەتىنىن اتاپ ءوتتى.
ءمينيستردىڭ ورىنباسارى ە. اشىقبايەۆ قوسىلماۋ قوزعالىسىنىڭ باستى قاعيدالارىنا ايتارلىقتاي ۇيلەسەتىن جانە ساي كەلەتىن جاپپاي قىرىپ-جويۋ قارۋىن تاراتپاۋ جانە حالىقارالىق قاۋىپسىزدىكتى كۇشەيتۋ سالالارىنداعى قازاقستان پرەزيدەنتى نۇرسۇلتان نازاربايەۆتىڭ نەگىزگى بىتىمگەرشىلىك جانە انتيادرولىق باستامالارىنا نازار اۋداردى.
سونىمەن قاتار، قازاقستاندىق ديپلومات ۇزاق مەرزىمدى تۇراقتىلىقتى قامتاماسىز ەتۋدىڭ كەپىلى بولىپ تابىلاتىن ءدىنارالىق جانە مادەنيەتارالىق ديالوگتىڭ دامۋىنا، تۇراقتى دامۋدىڭ ماقساتتارىنا جەتۋىنە، الەۋمەتتىك- ەكونوميكالىق تۇراقتى دامۋىنا دەگەن قازاقستاننىڭ بەرىك ۇستانىمىن اتاپ ءوتتى.
قوسىلماۋ قوزعالىسىنىڭ نەگىزگى ماقساتى - حالىقارالىق قۇقىق ۇستەمدىلىگى نەگىزىندە الەمدەگى بەيبىتشىلىك، قاۋىپسىزدىك جانە دامۋعا جاردەمدەسۋ بولىپ تابىلادى. قازاقستان بۇۇ جانە باسقا دا كوپجاقتى قۇرىلىمدار شەڭبەرىندە جانە ەكىجاقتى فورماتتا دا قوزعالىستىڭ بارلىق مۇشەلەرىمەن اۋقىمدى كۇن ءتارتىبى بويىنشا تىعىز قىزمەت ىستەۋدە.
