ءۇي جانۋارلارى بالالارعا قالاي اسەر ەتەدى - زەرتتەۋ
بۇل رەتتە شينشيللا اسىرايتىن بالالاردىڭ اقىل- پاراساتى ۇزدىك ناتيجەلەر كورسەتەدى.
5-16 جاس ارالىعىنداعى بالالاردىڭ %79 ى ءۇي جانۋارلارىن اسىراۋ ءۇي شارۋاسىن ورىنداۋعا وڭ ىقپال ەتەدى دەپ ەسەپتەيدى. شينشيللا اسىرايتىن بالالاردىڭ %55 ى وزدەرىنىڭ اقىل-ويى جاقسى دامىعانىن سەزىنەدى. جالپى، ءۇي جانۋارلارىن اسىرايتىن بالالار قامقور جانە جاۋاپكەرشىلىگى مول بولىپ وسەدى. مىڭنان اسا بالاعا ساۋالناما جۇرگىزگەن بريتاندىق الەۋمەتتانۋشىلار وسىنداي قورىتىندىعا كەلدى، دەپ حابارلايدى سەگودنيا.
ءارتۇرلى ءۇي جانۋارلارى بالالارعا ءار قيلى ىقپال ەتەتىنى انىقتالدى. مىسالى، ەگەۋقۇيرىقتار نەمەسە تىشقاندار اسىرايتىنداردىڭ %92 ى ءۇي شارۋاسىن ورىنداۋعا جاقسى سەپتىگىن تيگىزەدى دەپ ەسەپتەيدى. وسىنداي ىقپال ەتكەنى ءۇشىن بالالاردىڭ %86 ى يتكە، %80 ى مىسىققا العىس بىلدىرەدى. ساۋالناماعا قاتىسۋشىلاردىڭ تەڭ جارتىسى ۇيدە جانۋارلاردىڭ بولۋى ارقاسىندا وزدەرىن باقىتتى سەزىنەدى، ۇشتەن ءبىر بولىگى جانۋارلار ولاردىڭ بايسالدى ءارى سابىرلى بولۋىنا، ال %20 ى اقىلدىراق بولۋىنا سەپتىگىن تيگىزەتىنىنە سەنىمدى.
بۇل رەتتە شينشيللا جانە ۇساق كەمىرگىشتەردى اسىرايتىن بالالاردىڭ %55 ى ءوز قاتارلاستارىنا قاراعاندا وزدەرىن وتە اقىلدى سانايدى. باۋىرىمەن جورعالاۋشىلاردى اسىرايتىنداردىڭ %68 ى جانۋارلار ولاردىڭ بويىنا جاۋاپكەرشىلىك قاسيەتىن ۇيالاتقانىن مويىندايدى. ەكىنشى ورىندا ءۇي قوياندارىنىڭ (%61)، ءۇشىنشى ورىندا مىسىقتاردىڭ (%40)، ءتورتىنشى ورىندا يتتەردىڭ (%36) يەلەرى. ءۇي جانۋارلارىن ۇستايتىن بالالاردىڭ %20 ى ولاردىڭ باسقا بالالارمەن قارىم- قاتىناستى دۇرىس جولعا قويعانى ءۇشىن العىس بىلدىرەدى.
پسيحولوگتار ۇياڭ بالالاردىڭ ورتاعا بەيىمدەلۋى قابىلەتىن ارتتىرۋ ءۇشىن ءۇي جانۋارلارىن اسىراۋعا بۇرىننان كەڭەس بەرىپ كەلەدى. ەگەر بالا بىرەۋمەن تانىسۋدان جاسقاناتىن بولسا، ءۇي جانۋارلارى ونىڭ اينالاسىنداعىلارمەن تەز ءتىل تابىسۋىنا وڭ ىقپال ەتەدى.
