عالىمدار ءماتىندى جىلدام تەرۋدىڭ قۇپياسىن اشتى

ولاردىڭ جۇرگىزگەن زەرتتەۋلەرىنىڭ ناتيجەلەرى Sciency Daily جۋرنالىندا جاريالاندى، دەپ حابارلايدى Lenta.ru.

زەرتتەۋگە 200 ەلدەن ارنايى سايتقا تىركەلگەن 169 مىڭ ادام قاتىسقان.

ارنايى باعدارلاما ءماتىندى تەرۋ جىلدامدىعى مەن باسقا دا سيپاتتامالاردى تالداپ بەردى. پەرنەتاقتا تۇيمەشەلەرىنىڭ بارلىعى 136 ميلليون رەت باسىلۋى تالداندى. سونىمەن قاتار ەرىكتىلەر وزدەرىنىڭ جىنىسى، جاسى، كاسىبى تۋرالى دەرەكتەردى ۇسىندى.

ءماتىندى نەعۇرلىم جىلدام تەرەتىن جاندار قاتەلەردى از جىبەرەتىنى انىتالدى. باياۋ تەرەتىندەر وزدەرى جىبەرگەن قاتەلەردى ىزدەۋگە جانە تۇزەتۋگە كوپ ۋاقىت جۇمسايتىن بولىپ شىقتى.

ءماتىندى جىلدام تەرۋدىڭ تاعى ءبىر ەرەكشەلىگى - ءبىر مەزگىلدە بىرنەشە تۇيمەشەنى قاتار باسۋ. جىلدام تەرەتىن جاندار كەزەكتى سيمۆولدى قاجەت ۋاقىتىنان ەرتە باسىپ ەنگىزەدى. سيمۆولدى ولار الدىڭعى ءارىپتى نەمەسە ساندى تەرە سالىسىمەن ەنگىزەدى.

قازىرگى تاڭدا ادامنىڭ ءماتىندى تەرۋ جىلدامدىعىنىڭ ورتاشا كورسەتكىشى - مينۋتىنا 52 ءسوز. عالىمدار اتاپ وتكەندەي، بۇل 1980 -جىلدارداعى ماشينيستەردىڭ جىلدامدىعىنان الدەقايدا تومەن كورسەتكىش، ول كەزەڭدە ادامدار ورتا ەسەپپەن مينۋتىنا 60-90 ءسوز، ال تاجىريبەلى ءىس جۇرگىزۋشىلەر - 120 سوزگە دەيىن تەرەتىن بولعان.

عالىمدار وسى زەرتتەۋ ماتەريالدارى نەگىزىندە بىرنەشە ۇسىنىمدار قابىلدادى. بۇل - قاتە جىبەرمەۋگە تىرىسۋ، سەبەبى قاتەنى تۇزەتۋگە كوپ ۋاقىت كەتەدى؛ قاجەتتى تۇيمەشەنى الدىن الا باسۋ قاجەت؛ قاراماي تەرىپ ۇيرەنۋ، سەبەبى بۇل ءادىس جىبەرگەن قاتەلەردى تۇزەتۋ ءۇشىن جەڭىل.

سونىمەن قاتار، عالىمدار پايدالى داعدىنى جوعالتىپ الماۋ ءۇشىن ءماتىندى جىلدام تەرىپ جاتتىعۋعا كەڭەس بەرەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى