الماتى وبلىسىندا ەرەكشە ادام تۇرادى - فوتو
بازاربەك كەنجەبەكوۆ ەسىمدى تۇرعىننىڭ بۇكىل ىشكى قۇرىلىسىنىڭ ورنى اۋىسىپ كەتكەن، دەپ حابارلايدى قازاقپارات ءتىلشىسى.
59 جاستاعى تۇرعىننىڭ بۇكىل اعزاسىن ۋ ز ي-گە ءتۇسىرىپ، تەكسەرۋ جۇرگىزگەن قاپشاعاي قالاسىنىڭ دارىگەرلەرى بۇل تاڭعالارلىق جاعداي دەيدى. ولاردىڭ ايتۋىنشا، جالپى تاجىريبەلەرىندە جۇرەكتىڭ وڭ جاقتا ورنالاسۋى كەزدەسەدى. ءبىراق بۇكىل ورگاننىڭ ورنى اۋىسقانىن كورمەدىك دەپ وتىر.
«بازاربەك كەنجەبەكوۆتىڭ جۇرەگى وڭ جاقتا ورنالاسقان. باۋىرى وڭ جاعىندا بولۋى كەرەك، بۇل كىسىنىكى كەرىسىنشە سول جاعىندا. ءوتى سول جاعىندا. كوك باۋىرى وڭ جاعىندا، ول سول جاقتا بولۋى كەرەك. بۇل تاڭعالارلىق جاعداي. وتە سيرەك كەزدەسەدى»، - دەيدى قاپشاعاي قالالىق اۋرۋحاناسىنىڭ دارىگەرى ايسۇلۋ وڭعاروۆا.
ەڭ باستىسى دارىگەرلەر اقساقالدىڭ جاعدايى جاقسى ەكەنىن ايتادى. ەرەكشە تۇرعىن دا ءوزىن اركەز سەرگەك سەزىنىپ، شارشاۋدى بىلمەيمىن دەپ وتىر. ءبىراق ول وسى ۋاقىتقا دەيىن بۇكىل ىشكى قۇرىلىسىنىڭ ورنى اۋىسىپ كەتكەنىن بىلمەپتى.
«دەنساۋلىعىم جاقسى، ەشقاشان اۋىرىپ كورگەن جوقپىن. ءومىرى جۇمىس ىستەگەندە شارشامايمىن»، - دەيدى بازاربەك كەنجەبەكوۆ.
وزگە تۇرعىنداردان تابيعاتى بولەك جاننىڭ كۇندەلىكتى تىرلىگى ەسەك ارباسىنا وتىرىپ، كوشەلەردەگى قوقىستاردى جيناۋدان باستالادى ەكەن. بۇل قىزمەتى ءۇشىن ول اكىمدىكتەن 35 مىڭ تەڭگە جالاقى الاتىنىن ايتادى. ال ءومىر بويى باسىندا باسپاناسى بولماي، وزگەنىڭ ءۇيىن پانالاپ جۇرگەن بازاربەك كەنجەبەكوۆ ءۇش بالانىڭ اكەسى. كەنجەسى ەكىنشى توپتاعى مۇگەدەك.
