قازاقستاندىقتار جىل سايىن تەگىن مەديتسينالىق تەكسەرۋدەن وتە الادى

«بىزدە ەڭ قاراپايىم دەنساۋلىقتى كۇتۋ دەگەن ادەت جوق. ءدال وسىنداي ادەت بىزگە جەتىسپەيدى. دەنساۋلىق ساقتاۋ جۇيەسىنىڭ كورسەتكىشتەرىنە سۇيەنسەك، ناۋقاستاردىڭ كوپشىلىگى اۋرۋ مەڭدەپ، ابدەن شەگىنە جەتكەندە عانا دارىگەرگە حابارلاسادى. وتكەن جىلى ەلىمىزدەگى اۋرۋحانالارعا شامامەن 3 ميلليون ادام جاتقىزىلسا، ونىڭ 70 پروتسەنتى اۋىر جاعدايدا جەتكىزىلگەن»، - دەدى سەرىك تاڭىربەرگەنوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ودان بولەك، قور باسشىسى جىل سايىن باقيعا اتتاناتىنداردىڭ جارتىسىنا جۋىعى ەڭبەككە قابىلەتتى تۇرعىندار ەكەنىن باسا ايتتى.

«بىزدە جىل سايىن 90 مىڭعا جۋىق ادام كوز جۇمادى. ونىڭ 40 مىڭى ەڭبەككە قابىلەتتى جاستا باقيلىق بولادى. ولار كوپ جاعدايدا جۇرەك- قانتامىر اۋرۋلارىنان نەمەسە قاتەرلى ىسىكتەن كوز جۇمادى. سوندىقتان، اۋرۋدىڭ الدىن الۋ وتە ماڭىزدى»، - دەپ ءوز ءسوزىن تولىقتىردى ول.

سونىمەن بىرگە، س. تاڭىربەرگەنوۆ ساۋ ادامداردىڭ دا جىل سايىن تەگىن تەكسەرۋدەن وتە الاتىنىن ەسكە سالدى.

 «مەملەكەت تاراپىنان كەپىلدەندىرىلگەن تەگىن مەديتسينالىق كومەك اياسىندا ارتەريالىق قىسىمدى ولشەۋ، ەلەكتروكارديوگرافيا، ليپيدتەر مەن حولەستەرينگە قان ساراپتاماسى سەكىلدى تەكسەرۋلەردەن وتۋگە بولادى. مۇنىڭ بارلىعى اۋرۋدى دەر كەزىندە انىقتاۋعا جانە كەنەتتەن كەلەتىن ءولىمدى الدىن الۋعا مۇمكىندىك بەرەدى»، - دەپ ءوز ءسوزىن تۇيىندەدى س. تاڭىربەرگەنوۆ.

ايتا كەتەيىك، 7 - ءساۋىر كۇنى قازاقستاندا دۇنيەجۇزىلىك دەنساۋلىق ساقتاۋ كۇنى اتالىپ وتەدى. بۇل كۇنى ەلىمىزدىڭ بارلىق مەديتسينالىق ۇيىمدارىندا اشىق ەسىك كۇنى ۇيىمداستىرىلادى جانە كەز كەلگەن نيەت ءبىلدىرۋشى تەگىن تەكسەرۋدەن ءوتىپ، ارنايى مامانداردان كونسۋلتاتسيالىق كومەك الا الادى.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى