سەمەيدەگى جەدەل جاردەم اۋرۋحاناسى زاماناۋي جابدىقتارمەن قامتىلماق
بۇگىن قالاعا ساپارى بارىسىندا وبلىس اكىمى دانيال احمەتوۆ جەدەل مەديتسينالىق جاردەم اۋرۋحاناسىنىڭ جۇمىسىمەن تانىستى. دارىگەرلەرمەن كەزدەسۋى بارىسىندا ايماق باسشىسى بارلىق زاماناۋي جابدىقتاردى ءتيىمدى پايدالانۋ كەرەكتىگىن جەتكىزدى. سونداي- اق، دارىگەرلەرگە بىرەگەي قۇرال- جابدىقتارعا جۇمسالاتىن قارجىنى ساۋاتتى جۇمساۋ قاجەت ەكەنىن ايتتى.
وبلىستاعى جۇرگىزىلگەن اۋديت قورىتىندىسىنا سايكەس دەنساۋلىق ساقتاۋ مەكەمەلەرىن جابدىقتاۋ ءۇشىن 23 ميلليارد تەڭگە قاجەت.
ايماق باسشىسىنىڭ سوزىنشە، تەك جابدىقتار عانا ەمەس، الەمدىك ورتاشا كورسەتكىشكە ساي بولۋى ءۇشىن اۋرۋحانالارعا جيھاز دا كەرەك. سونداي- اق وبلىستا قولدانۋعا كەلمەيتىن جابدىقتار دا بار. مىسال رەتىندە وسكەمەن قالاسىنداعى وبلىستىق اۋرۋحانادا ورنالاسقان ءۇش انگيوگرافتى كەلتىرۋگە بولادى.
دانيال احمەتوۆتىڭ ايتۋىنشا، ءاربىر انگيوگراف ايماقتا تۇراتىن 250 مىڭ ادامدى تەكسەرىستەن وتكىزە الادى. ياعني، ءۇش انگيوگراف 750 مىڭعا جۋىق ادامدى قاراۋى كەرەك، ءبىراق بۇل قولدان كەلمەيدى. ايماق باسشىسى بۇل جەردە جابدىقتىڭ ورنالاسقان جەرىنىڭ ىڭعايسىزدىعىن اتاپ ءوتتى. ودان كەيىن وبلىس اكىمى وپەراتسيا بولمەسىن كورىپ ساتىپ الىنعان انگيوگرافتى ورناتۋعا بولاتىن ايتتى.
«سىزدەر اۋرۋحاناداعى وپەراتسيا بولمەلەرىنىڭ ءبىرىن قالىپقا كەلتىرىپ، سول جەرگە گيبريدتى وپەراتسيالىق بولمەنى جابدىقتاۋلارىڭىز كەرەك. ياعني شىعىندالماۋ ءۇشىن قولدانىستاعى بولمەلەردىڭ ءبىرىن پايدالانۋ كەرەك»، - دەدى وبلىس اكىمى.
ايماقتىق دەنساۋلىق ساقتاۋدى دامىتۋدىڭ كەشەندى جوسپارى جالعاساتىن بولادى. سەمەيدەگى جەدەل مەديتسينالىق جاردەم اۋرۋحاناسىن قازىرگى زامانعى جابدىقتارمەن تولىعىمەن جابدىقتاۋ جوسپارلانۋدا. مەديتسينا قىزمەتكەرلەرى الەمدەگى ۇزدىك كلينيكالاردا ءبىلىمىن جالعاستىرادى.
وبلىستىڭ باس دارىگەرى مارات شورانوۆتىڭ ايتۋىنشا، بۇل مەديتسينالىق مەكەمە بارلىق حالىقارالىق ستاندارتتارعا سايكەس كەلەدى.
اۆتور: شىنار عالىمبەك قىزى
