يراندا وتاندىق «تالان» فيلمى كورسەتىلەدى

 وتاندىق تۋىندى ءساۋىردىڭ 19-27- ءسى ارالىعىندا وتەتىن فەستيۆالدىڭ «شىعىس پانوراماسى» باعدارلاماسى بويىنشا قاتىسادى.

بەلگىلى رەجيسسەر بولات قالىمبەتوۆ تۇسىرگەن فيلمدە جيىرماسىنشى عاسىردىڭ 30-40- جىلدارىنداعى ەل تاريحىندا ورىن العان وقيعالار قاراپايىم ادامداردىڭ ءومىرى ارقىلى باياندالادى. فيلمنىڭ سسەناريى جازۋشى جۇسىپبەك قورعاسبەكتىڭ «قاسقىر- ادام» پوۆەسىنىڭ جەلىسى بويىنشا جازىلعان.

«ءساۋىر ايىنىڭ ورتاسىندا تەگەرانعا جول تارتامىن، يران كورەرمەندەرىنە «تالان» فيلمىن تانىستىرامىن. «فادجر» سىندى بەلدى كينوفەستيۆالدا كارتينانىڭ الەمدىك پرەمەراسى وتەتىنىنە وتە قۋانىشتىمىن»، - دەدى رەجيسسەر بولات قالىمبەتوۆ.

بيىل فەستيۆالدىڭ «شىعىس پانوراماسى» بايقاۋىنا 12 ەلدىڭ، اتاپ ايتقاندا قىتاي، ۆەتنام، ازەربايجان، يراك، گرۋزيا، ءۇندىستان، پالەستينا، جاپونيا، موڭعوليا، كۋۆەيت، سيريا جانە قازاقستاننىڭ فيلمدەرى قاتىسادى.

«فادجر» كينوفەستيۆالىندە «قازاقفيلم» كينوستۋدياسىنىڭ قاتىسۋىمەن تۇسىرىلگەن تاعى دا ءبىر كينوتۋىندى - «اكەگە قوڭىراۋ شالۋ» فيلمى كورسەتىلەدى. اتالعان كارتينا فەستيۆالدىڭ نەگىزگى حالىقارالىق كونكۋرسىندا باق سىنايدى. ايتا كەتسەك، رەجيسسەر سەرىك اپرىموۆ «فادجر» فەستيۆالىنە وسىدان 27 جىل بۇرىن قاتىسقان. 1991 -جىلى رەجيسسەر تۇسىرگەن «سوڭعى ايالداما» اتتى دەبيۋتتىق كارتينا «فادجر» فەستيۆالىنىڭ نەگىزگى بايقاۋىنا قاتىسىپ، «ۇزدىك فيلم» جۇلدەسىن العان بولاتىن.

ەستەرىڭىزگە سالا كەتسەك، «اكەگە قوڭىراۋ شالۋ» فيلمى قازاقستان كينوسىنشىلار قاۋىمداستىعى ۇيىمداستىرعان «سىنشىلار تاڭداۋى» كينوجۇلدەسىندە ەكى بىردەي جۇلدەگە - «ۇزدىك رەجيسسەر» جانە «ەكىنشى پلانداعى ۇزدىك ەر ادام ءرولى» (اكتەر ەربولات وسپانقۇلوۆقا تابىستالدى) قول جەتكىزدى. مۇنان بولەك، اتالعان تۋىندى رەسەيدىڭ «نيكا» اتتى كينوجۇلدەسىنە ۇمىتكەر بولعان. اتالعان تۋىندى 2018 -جىلى ءساۋىردىڭ 19-26 ارالىعىندا رەسەي استاناسىندا وتەتىن 40- ماسكەۋ حالىقارالىق كينوفەستيۆالىندە «شەبەرلەر» باعدارلاماسىندا كورسەتىلەدى.

فادجر حالىقارالىق فەستيۆالى 1982 -جىلى يراننىڭ مادەنيەت مينيسترلىگى جانە يسلام باعىتى ۇيىمىمەن نەگىزى قالانعان. فەستيۆال قيىر شىعىستاعى ەڭ اۋقىمدى ءارى تانىمال كينوفەستيۆال ەسەپتەلەدى.

بىلتىر 2017 -جىلى «فادجر» كينوفەستيۆالىنىڭ «ۇزدىك ازيالىق فيلمى» نوميناتسياسىندا باس جۇلدەنى «قازاقفيلم» كينوستۋدياسى جارىققا شىعارعان رەجيسسەر ءسابيت قۇرمانبەكوۆتىڭ «ورالمان» فيلمى الدى. بيىلعى «فادجر» جەڭىمپازدارى فەستيۆالدىڭ جابىلۋ سالتاناتىندا، 2018 -جىلى 27 - ساۋىردە جاريالانادى.

«تالان» فيلمىندە تاعدىردىڭ جازۋىمەن بار ءومىرىن ەلدەن جاسىرىن وتكىزگەن ادامنىڭ ورتامەن بايلانىسى اقىرى تراگەديامەن اياقتالادى. وسىنداي تالايلى تاعدىرلار ارقىلى ازاتتىق اڭساعان اتا- بابالارىمىزدىڭ ارمانى - تاۋەلسىزدىكتىڭ قادىر- قاسيەتى كورىنەدى. تالان - تاعدىردىڭ سينونيمى.

«اكەگە قوڭىراۋ شالۋ» فيلمى جاس جىگىتتىڭ بالا كەزىنەن باستاپ ەسەيگەن شاعىنا دەيىنگى 25 جىل ءومىرىن قامتيدى. كارتينادا بالانىڭ اكە- شەشەسىمەن اراسىنداعى قيىن قاتىناستارى، جەتكىنشەكتىڭ سەزىمدەرى مەن باسىنا تۇسكەن قيىندىقتارى سۋرەتتەلەدى.

مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى