تۇركى حالىقتارىنىڭ «ورتاق تۇركى ادەبيەتى» جارىققا شىعادى
ورتاق وقۋلىقتى شىعارۋ ماقساتىندا وي الماسۋ ءۇشىن بۇگىن تۇركى كەڭەسىنە مۇشە - قازاقستان، قىرعىزستان، ازەربايجان جانە تۇركيا ەلدەرىنىڭ ادەبيەتشى ماماندارى، ب ع م وكىلدەرى مەن اكادەميانىڭ ساراپشىلارى استانادا باس قوستى. جيىندا ءسوز باستاعان حالىقارالىق تۇركى اكادەمياسىنىڭ (TWESCO) پرەزيدەنتى دارحان قىدىرالى بۇگىن وقۋلىقتىڭ ءوزى ەمەس، باعدارلاماسى تالقىلاناتىنىن اتاپ ءوتتى.
«2015 -جىلى وسىندا وتكەن سامميت كەزىندە وقۋلىقتىڭ كونسەپتسياسى قابىلداندى. وعان ۇلكەن تۇركولوگ عالىمدار، ادەبيەت ينستيتۋتىنىڭ ديرەكتورلارى قاتىسقان ەدى. ق ر ب ع م- دە وسى كونسەپتسيانى ماقۇلدادى. 2016 -جىلى ءبىز باكۋ تۇركولوگيالىق كونگرەسىنىڭ 90 جىلدىعىنا وراي وتكىزىلگەن ۇلكەن جيىندا تۇركى الەمىنىڭ ۇلكەن عالىمدارىمەن پىكىر الماستىق. 2017 -جىلى وسى وقۋلىقتاردىڭ باعدارلامالارىن تاراپتارعا جىبەردىك. قازىرگە دەيىن تۇركيادان وسىعان بايلانىستى پىكىر كەلگەنىمەن، باسقا ەلدەردەن ناقتى ۇسىنىس بىلدىرگەن جوق. ۇسىنىستى وسى جەردە وتىرىپ، ايتادى دەگەن ۇمىتتەمىز»، - دەگەن TWESCO باسشىسى تۇركى كەڭەسىنە مۇشە ەلدەردىڭ وكىلدەرىنە ءسوز بەردى.
ءوز كەزەگىندە ازەربايجاننان مەملەكەتتىك پەداگوگيكالىق ۋنيۆەرسيتتىڭ دوتسەنتى ءبىلال حاسانوۆ، قىرعىزستان تاراپىنان حالىقارالىق قىرعىز- تۇرىك «ماناس» ۋنيۆەرسيتەتى شىعىس تىلدەرى ءبولىمىنىڭ مەڭگەرۋشىسى وسماناكۋن يبرايموۆ، تۇركيادان ۇلتتىق ءبىلىم بەرۋ مينيسترلىگى ەۋروپا وداعى جانە سىرتقى بايلانىستار دەپارتامەنتىنىڭ ديرەكتورى يلحان اكسوي، قازاقستان تاراپىنان ى. التىنسارين اتىنداعى ۇلتتىق ءبىلىم اكادەمياسى ورتا ءبىلىم ينستيتۋتى ديرەكتورىنىڭ ورىنباسارى قايىرجان راحىمجانوۆ جوباعا ءبىراۋىزدان قولداۋ بىلدىرەتىندەرىن جەتكىزدى.
«ورتاق تۇركى ادەبيەتى وقۋلىعىنا قاتىستى جاڭالىققا وتە قۋانىشتىمىز. بۇل ءبىزدىڭ العا قاراي ءبىر قادام باسقانىمىزدىڭ ءبىر كورسەتكىشى. وقۋلىق باعدارلاماسىندا تۇركى حالىقتارىنىڭ رۋحاني، ساياسي، تاريحي بىرلىگى وتە تەرەڭ كورسەتىلگەن. وقۋلىقتىڭ باعىتى دۇرىس. ورتاق تۇركى ادەبيەتى نەگىزى ءداستۇرلى ادەبيەتىمىزدەن باستالعان. اۋىز ادەبيەتى ۇلگىلەرى قويىلىپ، جازبا ەسكەرتكىشتەرىمىز جانە تۇركى حالىقتارىنىڭ ادەبي- كوركەم تۋىندىلارى دا تانىتىلعان. ازەربايجان ءبىلىم مينيسترلىگىنىڭ دە بۇل وقۋلىقتى قولداپ وتىرعانىن ايتقىم كەلەدى»، - دەدى ءبىلال حاسانوۆ.
جيىن بارىسىندا تۇركى كەڭەسىنە مۇشە ەلدەردىڭ بارلىق وكىلدەرى «ورتاق تۇركى ادەبيەتى» وقۋلىعىن شىعارۋدى تولىعىمەن قولدايتىندارىن جەتكىزدى.
اۆتور: ايان بەكەن ۇلى
