مەملەكەتتىك قىزمەتشىلەردى وقىتۋدىڭ تىڭ ادىستەرى ەنگىزىلەدى
اگەنتتىك بۇگىن ق ر پرەزيدەنتى جانىنداعى مەملەكەتتىك باسقارۋ اكادەمياسى بازاسىندا مەملەكەتتىك قىزمەتشىلەرگە ادەپ نورمالارى مەن زاڭ تالاپتارىن ساقتاۋ ماسەلەسى بويىنشا وقىتۋ جۇرگىزدى. وقىتۋ اياسىندا جاس مەملەكەتتىك قىزمەتشىلەر تارتىپتىك تەرىس قىلىقتى قاراۋدى جۇزەگە اسىراتىن ادەپ جونىندەگى كەڭەستىڭ وتىرىسىن ساحنالادى.
«بۇگىننەن باستاپ وسى وقىتۋدا جاڭا ينتەرەاكتيۆتى ادىستەرى قولدانىلۋدا. بۇگىنگى ساحنالانعان وتىرىستا جالپى تەرىس قىلىق بويىنشا تارتىپتىك ءىس قوزعالىپ قاراستىرىلادى. وسى وتىرىستىڭ باستى ماسەلەسى - مەكتەپ وقۋشىلارىنا جازعى دەمالىس ۇيىمداستىراتىن مەملەكەتتىك ساتىپ الۋ تۋرالى زاڭدى تۇلعانىڭ قىزمەتىنە كەدەرگى كەلتىرىپ، زاڭسىز ارالاسۋ فاكتىسى بويىنشا اۋداندىق ءبىلىم ءبولىمى باسشىسىنىڭ ورىنباسارى «جاۋاپقا تارتىلاتىن بولادى». ارىز بەرۋشى مەن جاۋاپقا تارتىلاتىن مەملەكەتتىك قىزمەتشى تىڭدالادى. ەڭ سوڭىندا مەملەكەتتىك قىزمەتشىگە جازا قولدانۋ تۋرالى ۇسىنىس جولدانادى»، - دەدى اگەنتتىكتىڭ مەملەكەتتىك قىزمەت سالاسىن باقىلاۋ دەپارتامەنتى ديرەكتورىنىڭ ورىنباسارى مادينا ناۋرىزبەك.
ايتا كەتەرلىگى، قىزمەتكە جاڭادان قابىلدانعان مەملەكەتتىك قىزمەتشىلەردى 3 اپتالىق قايتا دايارلاۋ كۋرستارىنان وتكىزۋ ارقىلى مەملەكەتتىك قىزمەتتىڭ قىر- سىرىن ۇقتىرۋ كوزدەلگەن. كۋرستان العان بىلىمدەرىن جاس مەملەكەتتىك قىزمەتشىلەر ادەپ جونىندەگى كەڭەستىڭ وتىرىسىندا تارتىپتىك ءىستى قاراۋ سسەناريى بويىنشا قويىلىمىن قويۋ ارقىلى تاجىريبەدە كورسەتتى.
اۆتور: ايان بەكەن ۇلى
