قازاقستاننىڭ قاي وڭىرىندە قاتەرلى ىسىك اۋرۋى كوپ تىركەلدى - مينيسترلىك جاۋابى
«بۇگىندە ەرلەر مەن ايەلدەر اراسىنداعى ىشەك قاتەرلى ىسىگى كورسەتكىشى بەسىنشى ورىننان ءۇشىنشى ورىنعا كوتەرىلدى. ادەتتە ەتتى كوپ جەۋ ىشەك قاتەرلى ىسىگىنە اكەپ سوعادى. ال تۇزدى از تۇتىنۋ اسقازان قاتەرلى ىسىگى اۋرۋىن ازايتۋعا سەپتىگىن تيگىزەر ەدى. ۆاكتسينالاۋ ارقىلى ب گەپاتيتىنىڭ الدىن الۋ - باۋىر قاتەرلى ىسىگىن ازايتۋعا ىقپال ەتەدى. قىزداردى HPV ۆيرۋسىنا (پاپيللوماعا قارسى - رەد. ) قارسى ۆاكسينالاۋ دا جاتىر موينىنىڭ قاتەرلى ىسىگىن ازايتار ەدى»، - دەدى ديليارا قايداروۆا سەناتتا وتكەن پارلامەنتتىك تىڭداۋلاردا.
دەنساۋلىق ساقتاۋ مينيسترلىگىنىڭ باس ونكولوگ-دارىگەرى قازىرگى ۋاقىتتا جاتىر موينى قاتەرلى ىسىگىنىڭ بەلەڭ الىپ كەلە جاتقانىن باسا ايتتى. سونداي-اق، دارىگەر قوعامنىڭ بۇل دەرتكە دەگەن كوزقاراسىنىڭ ءار ءتۇرلى ەكەنىن جەتكىزدى.
«حالىق اراسىندا ونكولوگيالىق كەسەلدەر «جامان اۋرۋ» دەپ اتالىپ كەتكەن. مۇنداي كوزقاراستاردان ارىلۋ كەرەك، ونكولوگياعا سوزىلمالى اۋرۋلار رەتىندە قاراۋ كەرەك»، - دەدى ول.
مينيسترلىك وكىلى كەلتىرگەن دەرەكتەرگە سايكەس، سوڭعى 20 جىلدا الەم بويىنشا ونكولوگيالىق كەسەلدەر كوبەيىپ كەلەدى. قازاقستاندا بۇل كورسەتكىش 1,5 ەسەگە ارتقان. اتالعان دەرتكە شامامەن 36 مىڭ قازاقستاندىق شالدىقسا، ونىڭ 15 مىڭعا جۋىعى قايتىس بولادى. ەرلەرمەن سالىستىرعاندا، ونكولوگيالىق اۋرۋمەن ايەلدەر ءجيى اۋىرادى. سەبەبى، قازىرگى ۋاقىتتا جەر- جاھاندا ءسۇت بەزىنىڭ قاتەرلى ىسىگى دەندەپ تۇر.
«ەرلەر اراسىندا وكپە، اسقازان، تىك ىشەك قاتەرلى ىسىكتەرى ءجيى كەزدەسەدى. سىرقاتقا شالدىققانداردىڭ 70 پايىزعا جۋىعى ەڭبەككە قابىلەتتى جاستا. سالدارىنان مەملەكەتكە جىلىنا 20 ميلليارد تەڭگەدەن استام شىعىن كەلەدى»، - دەپ ءتۇسىندىردى د. قايداروۆا.
مينيسترلىكتىڭ حابارلاۋىنشا، ونكولوگيالىق اۋرۋلاردىڭ جوعارى كورسەتكىشى پاۆلودار، سولتۇستىك قازاقستان، شىعىس قازاقستان، قوستاناي جانە اقمولا وبلىستارىندا تىركەلگەن.
