عالىمدار قازاقتارعا عانا ءتان ءۇش ەرەكشەلىكتى انىقتادى
بۇل تۋرالى «ەكسپرەسس ك» باسىلىمىنا رەسپۋبليكالىق ترانسفۋزيولوگيا ورتالىعىنىڭ ديرەكتور ورىنباسارى شايجامال مۋسابەكوۆا مالىمدەدى.
بەلگىلى بولعانداي، قازاقتاردىڭ اعزاسىندا وزگە حالىقتاردا كەزدەسپەيتىن ءۇش ەرەكشە گەن ءتۇرى بار ەكەن.
زەرتتەۋشىلەر قازاقتارعا عانا ءتان بۇل ءۇش گەن يممۋندىق قىزمەتتىڭ جۇمىسىنا جاۋاپ بەرەتىنىن انىقتاعان. ياعني قازاق حالقىنىڭ يممۋنيتەتى وزگە حالىقتارعا ۇقسامايتىن بولىپ شىقتى.
عالىمدار ءار حالىقتىڭ وزىنە عانا ءتان گەنى بولاتىنىن بۇعان دەيىن دە انىقتاي العان. ماسەلەن، تيبەت تۇرعىندارىنان قان اينالىمىنىڭ جاقسى بولۋىنا جاۋاپ بەرەتىن ەرەكشە گەن تابىلعان. بۇل تيبەتتىكتەردىڭ تاۋلى ايماقتا قينالماي تىرشىلىك ەتۋىنە كومەكتەسەدى ەكەن.
ال چۋكچالىقتار سۋىققا ءتوزىمدى بولۋعا بەيىمدەيتىن گەنگە يە بولىپ شىقتى. تىنىق مۇحيتى ماڭىندا تۇراتىن موكەن حالقى سۋ استىندا كورۋ قابىلەتىن ەسەلەيتىن ەرەكشە گەنمەن تۋىلادى. سول سەبەپتى، ولار قاراپايىم ادامدارعا قاراعاندا سۋ استىندا ەكى ەسە جاقسى كورەدى.
