باتىرحان شۇكەنوۆ اتىنداعى رەسپۋبليكالىق انشىلەر بايقاۋى ۇيىمداستىرىلماق

استانا قالاسىنىڭ 20 جىلدىعى مەن  قىزىلوردانىڭ 200 جىلدىعىنا تۇسپا-تۇس كەلگەن بۇل بايقاۋدى  قىزىلوردا وبلىسى اكىمدىگى قولداپ وتىر.

رەسپۋبليكالىق بايقاۋعا 18-30 جاس ارالىعىنداعى انشىلەر قاتىسا الادى. قاتىسۋشىلاردىڭ ونەر كورسەتۋ رەتتىلىگى الدىن-الا جەرەبە تاڭداۋ ارقىلى انىقتالادى. بايقاۋدىڭ باستى ەرەكشەلىگى انشىلەرگە مينۋسوۆكادا بەك-ۆوكالدى قولدانۋعا رۇقسات بەرىلمەيدى. كونكۋرستىڭ ءبىرىنشى كەزەڭىندە تالاپكەر ەركىن تاقىرىپتاعى ءاندى فونوگراممامەن (مينۋس-1) ورىنداسا، Ⅱ كەزەڭدە باتىرحان شۇكەنوۆتىڭ ءانىن ينسترۋمەنتالدى ءانسامبلدىڭ سۇيەمەلدەۋىمەن ايتۋى ءتيىس. قاتىسۋشىلاردىڭ ونەرىن باعالايتىن قازىلار القاسىنىڭ قۇرامىندا بەلگىلى كاسىبي مۋزىكانتتار، كومپوزيتورلار، وڭدەۋشىلەر مەن مادەنيەت جانە ونەر قايراتكەرلەرى بولادى. رەسەيدەن تانىمال مۋزىكانتتار مەن بەلگىلى تۇلعالار ارنايى قوناققا كەلمەك.

ايتا كەتەيىك، بايقاۋعا قاتىسۋ تۋرالى وتىنىمدەردى 2018-جىلدىڭ 20- ساۋىرىنە دەيىن الماتى قالاسىنداعى «تاڭداۋ» پروديۋسەرلىك ورتالىعى مەن  قىزىلوردا وبلىستىق حالىق شىعارماشىلىعىن دامىتۋ جانە مادەني-پروديۋسەرلىك ورتالىعىنا جىبەرۋ كەرەك.

18-مامىر كونكۋرس تالاپكەرلەرىنىڭ قاتىسۋىمەن اشىق اسپان استىندا باتىرحان شۇكەنوۆتى ەسكە الۋعا ارنالعان گالا-كونسەرت بولادى. ءدال وسى كۇنى باتىرحان شۇكەنوۆتىڭ ەسكەرتكىشى قويىلىپ، اس بەرىلەدى. سونىمەن قاتار، ونەرپازدار تال وتىرعىزىپ، قالانى كوگالداندىرۋ جۇمىستارىنا اتسالىسادى. بايقاۋ تۇڭعىش رەت 2016-جىلى ءوتىپ، وعان 27 ونەرپاز قاتىسقان ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى