قازاقتىڭ موتسارتى اتانعان راحات-بي ءابدىساعىن تۋرالى نە بىلەمىز

بۇل تۋرالى Stan.kz اقپاراتتىق اگەنتتىگى حابارلايدى.

جاس جىگىت 10 جاسىنان باستاپ مۋزىكا جازا باستاعان. ول تۋىندىلارى بۇكىلالەمدىك قورعا (وڭتۇستىك يللينويس ۋنيۆەرسيتەتىنىڭ «Discography» وركەسترىنە ارناپ فورتەپيانومەن ورىندالاتىن تۋىندىلار) كىرگەن تاۋەلسىز قازاقستاننىڭ جالعىز كومپوزيتورى. ءدال وسى قوردا الەمدىك كلاسسيكانىڭ ۇزدىك ۇلگىلەرى جيناقتالعان. وندا باح، گايدن، موتسارت سىندى زاماناۋي كلاسسيكتەردىڭ شىعارمالارى بار.

راحات-بي ءابدىساعىن - 100 گە جۋىق تۋىندىنىڭ اۆتورى. ونىڭ مۋزىكاسى ەۋروپانىڭ بارلىق دەرلىك جانە ازيانىڭ كەي ەلدەرىندەگى كونتسەرتتىك زالداردا قويىلادى. ونىڭ شىعارمالارىنىڭ الەمدىك تۇساۋكەسەرى پراگا، لوندون، ۆەنا، پاريج، بەرلين، سەۋل، انكارا، ىستانبۇل، ماسكەۋ، روگاشكا- سلاتينا، بەرگامو، اركەيە، تەۋلادە- مورايرە، الماتى مەن استانادا وتكەن.

راحات-بي تەك قانا مۋزىكا ەمەس، مۋزىكاتانۋ وقۋلىقتارىن جازادى. ول نەبارى 14 جاسىندا «ماتەماتەريكا مەن زاماناۋي مۋزىكا» عىلىمي ەڭبەگىن جارىققا شىعارعان. سونداي-اق، ول «ۇيلەسىمدىلىك شەگى» جيناعىنىڭ اۆتورى.

مۋزىكانت ءارى كومپوزيتور بىرنەشە شەت ءتىلىن مەڭگەرگەن. اعىلشىن، يتاليان، سونداي-اق، نەمىس ءتىلىن ۇيرەنۋ ۇستىندە.

راحات-بي الماتىدا 1999 -جىلدىڭ 2-اقپانىندا دۇنيەگە كەلگەن. ول - «دارىن» مەملەكەتتىك سىيلىعىنىڭ ەڭ جاس لاۋرەاتى. ونەر يەسى نەبارى 13 جاسىندا قۇرمانعازى اتىنداعى قازاق ۇلتتىق ونەر كونسەرۆاتورياسىنا وقۋعا تۇسكەن. ول اتالعان وقۋ ورنىمەن ءبىر ۋاقىتتا يتالياداعى Santa Cecilia Di Bergamo ونەر اكادەمياسىن ءتامامداعان. 18 جاسىندا ونەرتانۋ عىلىمدارىنىڭ ماگيسترى اتانعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى