ۇكىمەت دارىگەرلەردىڭ ماتەريالدىق جاعدايىن جاقسارتۋى كەرەك - توقايەۆ
بۇل تۋرالى ق ر پارلامەنتى سەناتىنىڭ ءتوراعاسى قاسىم-جومارت توقايەۆ ءمالىم ەتتى، دەپ حابارلايدى قازاقپارات.
«ۋاقتىلى مەديتسينالىق كومەك كورسەتۋ، ونىڭ قولجەتىمدىلىگى مەن ساپاسىن قامتاماسىز ەتۋ - بۇل سالانىڭ باستى مىندەتى. ەلباسى قاڭتار ايىنداعى جولداۋىندا وسى سالانىڭ الدىنداعى ءبىرقاتار ناقتى مىندەتتەردى انىقتاعان بولاتىن. سوعان سايكەس، ناۋقاستاردى ەمدەۋدە قىمباتقا تۇسەتىن ستاتسيونارلىق ەمگە قاراعاندا، نەگىزىنەن اۋرۋدىڭ الدىن الۋعا باعىتتالعان شارالارعا باسىمدىلىق بەرۋدىڭ، اۋرۋدى ۋاقتىلى انىقتاۋ مەن ەمدەۋدى قامتاماسىز ەتەتىن جاڭا تەحنولوگيالاردى ەنگىزۋدىڭ ماڭىزى زور. سونىمەن قاتار، تەگىن مەديتسينالىق كومەكتىڭ جاڭا مودەلىن ازىرلەۋ، مەديتسينا ماماندارىنىڭ ساپاسىن كوتەرۋ جانە دەنساۋلىق ساقتاۋ جۇيەسىن سيفرلاندىرۋ كەزەك كۇتتىرمەيتىن ماسەلەلەردىڭ قاتارىندا. ەلىمىزدە دەنساۋلىق ساقتاۋ ماسەلەلەرىنە ۇنەمى ەرەكشە ءمان بەرىلىپ كەلەدى. جەتكىلىكتى زاڭنامالىق بازا قالىپتاستىرىلىپ، سالانى قارجىلاندىرۋ ايتارلىقتاي ارتتىرىلۋدا. وسىنداي ساياساتتىڭ ناتيجەسىندە، جالپى بۇل سالادا ىلگەرىلەۋ بار. اتاپ ايتقاندا، حالىقتىڭ تابيعي ءوسۋى ارتىپ، انا مەن بالا ءولىمى ازايدى. ءبىرقاتار الەۋمەتتىك ماڭىزى بار اۋرۋلار بويىنشا سىرقاتتانۋ دەڭگەيى تومەندەدى»، - دەدى توقايەۆ سەناتتاعى «ۇزدىك دەنساۋلىق ساقتاۋ ءىسى - دەنى ساۋ ۇلت» تاقىرىبىنداعى پارلامەنتتىك تىڭداۋدا.
ونىڭ سوزىنە قاراعاندا سالادا ايتارلىقتاي ەلەۋلى تابىسقا قول جەتىكىزىلگەنىمەن، ءالى كۇنگە دەيىن شەشىمىن تاپپاعان ءبىرقاتار ماسەلەلەر بار.
«ولار ەڭ الدىمەن، مەديتسينالىق قىزمەتتىڭ قولجەتىمدىلىگى مەن تيىمدىلىگىنە بايلانىستى. مەديتسينا ماماندارىن دايارلاۋدىڭ ساپاسى مەن ولاردى ءتيىستى جۇمىس جاعدايىمەن قاتاماسىز ەتۋ اسا ماڭىزدى ماسەلە بولىپ وتىر. مەديتسينا قىزمەتكەرلەرىنىڭ ەڭبەكاقىلارىن ارتتىرۋ جانە ىنتالاندىرۋدىڭ ءتيىمدى جۇيەسىن قالىپتاستىرۋ - كۇن تارتىبىندەگى ماڭىزدى مىندەتتەردىڭ ءبىرى. ۇكىمەت دەنساۋلىق ساقتاۋ سالاسى قىزمەتكەرلەرىنىڭ ماتەريالدىق جاعدايىن جاقسارتۋ بويىنشا ءتيىستى شارالار قابىلداۋى قاجەت. مەملەكەت باسشىسىنىڭ جۋىرداعى ۇندەۋىندە ايتىلعان اۋقىمدى الەۋمەتتىك جوبالاردى وڭتايلى جۇزەگە اسىرۋ - ازاماتتاردىڭ، سونىڭ ىشىندە مەديتسينا قىزمەتكەرلەرىنىڭ دە تۇرمىس جاعدايىن جاقسارتارى انىق»، - دەدى ول.
ق. توقايەۆتىڭ اتاپ وتۋىنشە، ەلىمىزدە مەديتسينالىق جوعارى وقۋ ورىندارى جىل سايىن 4 مىڭنان استام مامانداردى دايارلايتىنىنا قاراماستان، وسى سالادا، اسىرەسە اۋىلدىق جەرلەردە بايقالىپ وتىرعان مامان تاپشىلىعى الاڭداتادى.
«ولاردىڭ كاسىبي دايىندىعىنىڭ ساپاسى دا سۇراق تۋدىرۋدا. كەيبىر جەكەلەگەن ساراپتاما ناتيجەسىنە سايكەس، مەديتسينالىق جوعارى وقۋ ورىندارىن ءبىتىرۋشى تۇلەكتەردىڭ ءاربىر ءتورتىنشىسى عانا تاڭداعان ماماندىعى بويىنشا قىزمەت ەتۋدە. مەديتسينالىق جوعارى وقۋ ورىندارىنا قابىلداناتىن ستۋدەنتتەردىڭ سانىنا ەمەس، ولاردى دايىنداۋدىڭ ساپاسىنا كوبىرەك كوڭىل بولگەن ءجون»، - دەدى سەنات ءتوراعاسى.
