قازاقستاندا ءدارى-دارمەكتەردىڭ قىمباتتاۋىنىڭ سەبەبى انىقتالدى
ءتۇرلى اۋرۋدىڭ باس كوتەرەتىن، ۆيرۋستىڭ ءورشىپ تۇرعان شاعى كوكتەمدە ءدارى-دارمەك باعاسىنىڭ ءوسۋى كەزدەيسوقتىق پا؟ ەگىستىك ماۋسىمىندا تاپشىلىققا تاپ بولىپ، قۇنى شارىقتايتىن جانارماي باعاسىنىڭ سەناريىنە ۇقسايتىنداي، دەپ حابارلادى ك ت ك.
جىل باستالعالى ءۇش اي ءوتتى. ءبىرىنشى توقساندى قورىتقان ساراپشىلاردىڭ زەرتتەۋى كوڭىل كونشىتپەيدى. قاي سالادا بولماسىن قىمباتشىلىقتىڭ جەلى ەسىپ تۇر.
بىلتىرمەن سالىستىرعاندا ەل بويىنشا دارىلەردىڭ باعاسى ورتاشا 7 پايىزعا دەيىن كوتەرىلگەن. گارموندىق دارىلەر 20, ال انالگەتيكتەر 12 پايىزعا وسكەن. اسقازان اۋرۋىنا ىشەتىن دارىلەر دە قىمباتتاپ، 9 پايىزعا جوعارى بوپ تۇر. رەسپۋبليكا بويىنشا، الماتى وبلىسى تۇرعىندارىنىڭ قالتاسىنا سالماق تۇسكەن. باسقا وڭىرلەرمەن سالىستىرعاندا بۇل جاقتا ءدارىنىڭ قۇنى 14 پايىزعا قىمباتتاعان. ماڭعىستاۋ مەن اتىراۋ وبلىسىندا دا 10 پايىزعا ءبىراق كوتەرىلگەن. تەك شىعىس قازاقستان وبلىسىندا جاعداي تۇراقتى.
وسى ورايدا ءسىز بەن ءبىزدىڭ سانامىزدا سۇراق تۋىندايدى-نەلىكتەن قىمباتشىلىق ءوڭىر تاڭدايدى؟ جاۋابى قاراپايىم. ءدال وسى وبلىستاردا كوكتەمدە اللەرگەيا اۋرۋى قوزادى. تيىسىنشە، دارىگە سۇرانىس ارتادى.
«سۇرانىس كوبەيگەن جاعدايدا ول ەكونوميكانىڭ زاڭدىلىعى باعا كوتەرىلۋ باستالادى. جىل سايىن ەكى ۋاقىتتا باعانى كوتەرۋ بايقالىپ وتىرادى. اسىرەسە كوكتەم ۋاقىتى كەلگەن كەزدە»، - دەيدى ەكونوميست ماقسات سەرالى.
قازاقستانداعى فارماتسەۆتيكالىق كومپانيالار زەرتتەۋ قورىتىندىسى بويىنشا سوڭعى ەكى ايدىڭ ىشىندە 4 توننا ءدارى- دارمەك شىعارعان. بۇل وسى ۋاقىتتاعى بىلتىرعى كورسەتكىشتەن باقانداي 45 پايىزعا كوپ. تىپتەن، شىعارىلعان فارماتسەۆتيكالىق ءونىمنىڭ جالپى قۇنى 13 ميلليارد تەڭگەگە جەتكەن.
سولاي بولا تۇرا، جۇرتشىلىق ودان سايىن اۋرە-سارساڭعا تۇسەتىن ءتۇرى بار. ويتكەنى، ءدارى- دارمەكتىڭ باعاسى ودان ءارى كوتەرىلمەسە تۇسپەيدى دەيدى ساراپشىلار. ءبىر شەتى، باعا ساياساتىن قاداعالايتىن ۇيىمداردىڭ جاعدايدى ءجىتى باقىلاۋىنا الماۋىنان فارماتسەۆتيكالىق كومپانيالار تايراڭداپ ءجۇر. قۇلقىننىڭ قامىمەن باعانى قولدان كوتەرگەندەردىڭ تابەتىن اۋىزدىقتاۋ قيىن. ويتكەنى ءدارى- دارمەكتىڭ ءتۇرى 2 مىڭنان اسادى. ءارقايسىسىن باقىلاۋعا ۋاقىت تا، مامان دا جەتپەيدى. سوندىقتان، ازىرگە قازانشىنىڭ ءوز ەركى قۇلاقتى قايدان شىعارسا دەپ كونۋدەن باسقا امال جوق.
