قازاقستاندا قاعاز قالدىقتارىن شەت ەلگە شىعارۋدى شەكتەۋ ۇسىنىلدى
ماكۋلاتۋرادان كارتون شىعاراتىن «بۋمپروم» كومپانياسى باسشىسىنىڭ ورىنباسارى سەرىك تاشنازاروۆ وسىلاي ءمالىم ەتتى، دەپ حابارلايدى قازاقپارات.
و ق و اكىمىنىڭ باسپا ءسوز قىزمەتىنىڭ مالىمەتىنشە، اتالمىش كومپانيا قاعاز قالدىقتارىنان ايىنا 350 توننا كارتون شىعارادى.
زاۋىتقا قاجەتتى شيكىزات قىزىلوردا، الماتى، شىمكەنت قالالارىنان تاسىمالدانادى. بۇگىندە زاۋىت باسشىلىعى وندىرىسكە قاجەتتى قاعاز قالدىقتارىنىڭ ءبىر كەلىسىن 40 تەڭگەدەن ساتىپ الىپ وتىر.
«زاۋىت توقتاۋسىز جۇمىس ىستەۋى ءۇشىن قاعاز قالدىقتارى ياعني ماكلاتۋرا قاجەت. قازىرگى تاڭدا شيكىزاتتىڭ باعاسى كۇننەن كۇنگە ءوسىپ جاتىر. ويتكەنى ءبىزدىڭ نارىقتاعى قاعاز قالدىقتارىن وزبەكستاندىق كاسىپكەرلەر ساتىپ الۋ ۇستىندە. ولار بۇگىندە ماكالاتۋرانىڭ ءبىر كەلىسىنىڭ باعاسىن 60 تەڭگەگە دەيىن كوتەرىپ جىبەردى. سوندىقتان «اتامەكەن» كاسىپكەرلىك پالاتاسىنا شيكىزاتتىڭ وسى ءتۇرىن شەت ەلگە شىعارۋعا شەكتەۋ قويسا دەگەن ۇسىنىسىمىزدى جولدادىق»، - دەيدى كاسىپورىن باسشىسىنىڭ ورىنباسارى سەرىك تاشنازاروۆ.
«بۋمپروم» ج ش س - 2016-جىلى جىلى ىسكە قوسىلعان جوبالاردىڭ ءبىرى، «وڭتۇستىك» يندۋستريالدىق ايماعىندا ورنالاسقان. جوبانىڭ جالپى قۇنى 200 ميلليون تەڭگە. كاسىپورىن جىلىنا 4 مىڭ، ال ايىنا 350 توننا ءونىم شىعارۋعا قاۋقارلى. بۇگىندە مۇندا 30 ادام جۇمىسپەن قامتىلعان.
زاۋىتتا توقتاۋسىز جۇمىس ىستەپ تۇرعان قوندىرعى قىتايدان ارنايى اكەلىنگەن. قاعاز قالدىقتارىن ءجىبىتىپ، قايتا كارتون ەتەتىن قۇرىلعىدا جەرگىلىكتى ازاماتتار جۇمىس ىستەيدى. ولارعا قىتايلىق ماماندار قوندىرعىمەن جۇمىس ىستەۋدى ارنايى وقىتقان.
قازىرگى تاڭدا زاۋىت ونىمدەرىنە سۇرانىس مول. اسىرەسە، تاپسىرىستار پاۆلودار، قاراعاندى، الماتى وبلىستارىنان ءجيى تۇسەدى. الداعى ۋاقىتتا كاسىپورىن باسشىلىعى ءوز ونىمدەرىن كورشىلەس وزبەكستان، قىرعىزستان مەملەكەتتەرىنە جونەلتۋدى جوسپارلاپ وتىر.
