استانادان الاتىن «التىن» تاجىريبە - موڭعوليالىق ب ا ق
موڭعوليا بۇقارالىق اقپارات قۇرالدارى بۇل وتىرىسقا ەرەكشە ءمان بەردى.
«اراعا ءتورت جىل سالىپ ۇيىمداستىرىلعان ۇكىمەتارالىق كوميسسيانىڭ قورىتىندىسىندا بۇل جولى ساۋدا جانە ەكونوميكا، ينۆەستيتسيا، ىسكەرلىك ىنتىماقتاستىق، تاۋ-كەن، كولىك، قورشاعان ورتا، اۋىل شارۋاشىلىعى، ءبىلىم، عىلىم جانە مادەنيەت سالالارىنداعى ىنتىماقتاستىقتى نىعايتۋ جونىندە تاراپتاردان ۇسىنعان ءاربىر پىكىردى تالقىلاپ، ءوزارا كەلىسىمگە كەلگەن ءتيىمدى كەزدەسۋ بولدى» - دەپ موڭعوليانىڭ اقپارات قۇرالدارى جارىسا جازا باستادى.
ۇكىمەتارلىق كوميسسياعا قاتىسىپ قايتقان موڭعوليا كوميسسيا مۇشەلەرى، ەلگە كەلە سالىسىمەن باسپا سوزگە بەرگەن سۇحباتتارىندا، جازعان ماقالا، ساراپتاما، ساپارناما رەپورتاجدارىندا «قازاقستاننىڭ تاجىريبەسىنەن ۇيرەنەيىك» دەگەن ءسوزدى كوبىرەك قولداندى. سولاردىڭ ءبىرى جۋرناليست ش. چيمەگتىڭ موڭعوليانىڭ بىرنەشە تانىمال اقپارات قۇرالدارىندا جارىق كورگەن «استانادان الاتىن «التىن» تاجىريبە» اتتى ساراپتامالىق ماقالاسى بولدى.
جۋرناليست: «1990-جىلى قازاقستان رەسپۋبليكاسى العاشقى قادامىن موڭعوليامەن بىردەي دەڭگەيدەن باستاعان ەدى. الايدا ولاردىڭ قازىرگە دامۋى بىزدەن كوش ىلگەرى، عالامات! استانا قالاسى 1997-جىلى سالىنا باستاعان، 21 اق جاستاعى - «جاس قالا». ەل استاناسىن كونە شاھار الماتىدان كوشىرىپ، اۋماعى 600 شارشى گەكتار جازىققا جاڭادان تۇرعىزعان. نازاربايەۆتىڭ ەرلىگى دە وسى تۇستا بايقالدى. قازىر الەمنىڭ اتاقتى ساۋلەتشىلەرىنىڭ كوركەم يدەيالارى استانا قالاسىندا بوي كورسەتەدى»، - دەپ جازادى.
سونىمەن قاتار، ءتىلشى استانانىڭ، جالپى قازاقستاننىڭ قارىشتاپ دامۋىن ەڭ ءبىرىنشى كەزەكتە ەل باسقارۋداعى ۇلىق مەنەدجەر رەتىندە نازاربايەۆتى اتاپ، پرەزيدەنت پارمەنىمەن قۇرىلعان ۇلتتىق ءال-اۋقات قورىنىڭ تاجىريبەسىنە تامسانادى.
«ءال-اۋقات» قورى ءبىز ءۇشىن تاڭسىق دۇنيە ەمەس. سوڭعى ون نەشە جىل بويى ۇزدىكسىز ايتىلىپ، تالقىلانىپ كەلگەن ماسەلە. ءبىز «ءال-اۋقات» قورىن قۇرامىز، قۇرمايمىز دەپ داۋلاسىپ جاتقاندا ۇلتتىق ءال-اۋقات قورىن دۇرىس باسقارعان قازاقستان، العا قادام باسىپ، اسا ۇلكەن امبيتسيالى ەل بولدى»، - دەپ جازادى جۋرناليست.
موڭعوليانى قىزىقتىرعان قازاقستاندىق ەكىنشى تاجىريبە - التىن وڭدەۋ. «قازاقستان التىندارىن ۇكىمەتتەرى وزدەرى ساتىپ الادى، وزدەرى وڭدەپ ساقتايدى. شەكارادان سىرتقا دەرلىك التىن شىعارمايدى. تابيعي قازبا بايلىققا باي ەلدەر التىندارىن وزدەرى وڭدەپ، وزدەرى ساقتاپ دوللار قورىن قۇرايدى. ال موڭعوليا بولسا بۇگىنگە دەيىن التىنىن سىرت ەلدەرگە شىعارىپ وڭدەتىپ، قۇيدىرىپ اكەلىپ ساقتايدى. بۇعاندا ايتارلىق قاراجات جۇمسايدى. ولاي بولسا جۋىقتا بولىپ وتكەن ۇكىمەتارالىق كوميسسيا دا قازاقستان رەسپۋبليكاسى التىن وڭدەيتىن ءوندىرىستىڭ قىر-سىرىن موڭعولياعا اقىسىز ۇيرەتۋگە بولادى دەگەن بولاتىن. ەگەردە ءبىز بۇل مۇمكىندىكتى پايدالانىپ شىداساق، وتاندا التىن وڭدەيتىن زاۋىتتى بولاتىن مۇمكىندىك قولعا كەلدى»، - دەپ جازادى جۋرناليست.
