استانادا اۆتوتۇراق جەتىسپەيدى: اكىم پرەزيدەنتتەن ءسوز ەستىدى
«نۇرلى جول بۋلۆارى كولىككە تولىپ تۇر، ۇكىمەت ءۇيى مەن اكىمدىكتىڭ الدىندا دا سول جاعداي. سەنىڭ كوز الدىڭدا - تەرەزەڭدى اشىپ قاراساڭ - بەي-بەرەكەت؟!»، - دەدى مەملەكەت باسشىسى ەلوردانى ودان ءارى دامىتۋ ماسەلەلەرى جونىندەگى ماجىلىستە.
بۇدان كەيىن ءسوز العان اكىم اتالعان ماسەلەنى شەشۋ ءۇشىن ناقتى جوبالار جۇزەگە اسىپ جاتقانىن ايتىپ اقتالدى.
«بيىل «اكىمدىك، سۋم الدىنداعى تۇراقتار» اتتى 2 مىڭ ورىندىق جوبالار باستالادى. «نۇرلى جول» الدىندا اقىلى اۆتوتۇراقتىڭ جوباسى ەنگىزىلدى»، - دەدى اكىم.
بۇعان قاتىستى سويلەگەن مەملەكەت باسشىسى بۇل ماسەلەنى شەشۋ ءۇشىن ناقتى ءتارتىپتىڭ جوقتىعىن ايتتى.
«اۆتوتۇراقتار بويىنشا ءبىز ناقتى جۇمىستاردى ىسكە اسىرۋىمىز كەرەك. بارلىق قۇرىلىس سالۋشىلاردى جەراستى تۇراقتارىن سالۋعا مىندەتتەۋگە ءتيىسپىز. استانادان دا ۇلكەن قالالار بار، ءبىراق ولار بۇل ماسەلەنى ءتيىمدى شەشىپ جاتىر... بىزدە ءتارتىپ جوق. اۆتوتۇراق ءۇشىن اقشا المايسىڭدار. «مەرسەدەس» ءۇشىن اقشا بار ما، دەمەك ساعات بويىنشا اۆتوتۇراققا تولەۋگە دە اقشا بار دەگەن ءسوز. تارتىپكە باعىنباعانداردىڭ بارىنە قاتاڭ تۇردە ايىپپۇل تولەتۋ كەرەك»، - دەدى پرەزيدەنت.
پرەزيدەنتتىڭ ايتۋىنشا، قولعا الىنعان ناقتى شارالار تۇراق اۋماعى ماسەلەسىن شەشۋگە مۇمكىندىك بەرەدى.
«قالادا تۇراقتار ماسەلەسىنىڭ شەشىلمەۋى سالدارىنان جەدەل جاردەم دە، ءورت سوندىرۋشىلەر دە عيماراتتى اينالا الماي قالادى»، - دەدى نۇرسۇلتان نازاربايەۆ.
