نۇرسۇلتان نازاربايەۆ: «بەس الەۋمەتتىك باستامانى» تولىق جۇزەگە اسىرۋ كەرەك
«استانا زاماناۋي تەحنولوگيالار مەن ۇزدىك تاجىريبەنى ەنگىزىپ وتىر. مۇندا الەمگە تانىمال ساۋلەتشىلەر ءوزىنىڭ ۇزدىك جوبالارىن جۇزەگە اسىردى. وسىنىڭ بارلىعى ۇلكەن جاۋاپكەرشىلىكتى جۇكتەيدى. «استانا» حالىقارالىق قارجى ورتالىعى قۇرىلعانىن بىلەسىزدەر. ول ەلىمىزدەگى الەمدىك قارجى جۇيەسىنە باستايتىن كوپىر بولىپ سانالادى. قالا توڭىرەگىندەگى ساياباقتار، جاسىل بەلدەۋ ەلوردانىڭ ايشىقتى بەلگىسى»، - دەدى ەلباسى.
استانا ءوزىنىڭ حالىقارالىق مارتەبەسىن ەلەۋلى تۇردە نىعايتقانىنا، ۇلكەن حالىقارالىق فورۋمدار جۇمىس ىستەگەنىنە توقتالعان پرەزيدەنت، «استانا پروتسەسى اياسىندا سيرياداعى جاعدايدى تۇراقتاندىرۋعا ارنالعان كەلىسسوزدەر جۇرگىزىلىپ كەلەدى. وتكەن جىلى «ەكسپو-2017» كورمەسىن جوعارى دەڭگەيدە ۇيىمداستىردىق. وعان 115 ەلدەن، 22 حالىقارالىق ۇيىمنان ءتورت ميلليونعا جۋىق ادام كەلدى. بارلىعى ءبىزدىڭ استانامىزدى كوردى، ەلىمىزبەن تانىستى»، - دەدى.
«ەكسپو بازاسىندا جاسىل تەحنولوگيالار مەن ينۆەستيتسيالاردى دامىتۋ جونىندە حالىقارالىق ورتالىق جانە ІТ - ستارتاپ ىسكە قوسىلدى. كەشە ۇكىمەت باسشىسىنىڭ ماعان بەرگەن مالىمەتىن قاراپ شىقتىم، ياعني وندا ەكسپوداعى عيماراتتاردى پايدالانۋ ءتارتىبى ەسكەرىلگەن. بارلىعى ءبولىندى، ونداعى نىسانداردىڭ ەندىگى قىزمەتىن بىلەمىز»، - دەدى مەملەكەت باسشىسى.
ەلباسى قالانى سالۋ تۋرالى قابىلدانعان ساياسي شەشىم دۇرىس ەكەندىگىن ۋاقىت كورسەتىپ وتىرعانىن قاداپ ايتتى.
«ەلىمىزدىڭ وسەتىن تاعى ءبىر نۇكتەسى پايدا بولدى. وسى باعىتتا بولىنگەن قارجىنىڭ بارلىعى قايتارىلدى. الايدا قول جەتكىزگەن جەتىستىكتەرمەن توقتاپ قالماۋ كەرەك. جولداۋدا ءتيىستى مىندەتتەردى بەلگىلەدىم جانە سول بويىنشا جۇمىستى جانداندىرۋ قاجەت. سونىمەن قاتار، جاڭا «بەس الەۋمەتتىك باستامانى» تولىق جۇزەگە اسىرۋ كەرەك»، - دەپ ءتۇيدى ءسوزىن نۇرسۇلتان نازاربايەۆ.
