ەلباسى دوسايەۆ پەن شوكەيەۆكە ءۇي تاپسىرماسىن بەردى
بۇل تۋرالى ەلوردانى ودان ارى دامىتۋ ماسەلەلەرى جونىندەگى ماجىلىستە ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.
«بارلىق ۋاقىتتا دا قالانىڭ ازىق-تۇلىك بەلدەۋى جايىندا ايتىپ كەلەمىن. قالادا ينفلياتسيا 7,5 پايىز. قازىر قازاقستانداعى ەڭ جوعارىسى دەيدى. سولاي ما، الدە قانشا؟»، - دەدى نۇرسۇلتان نازاربايەۆ قالا باسشىسى اسەت يسەكەشەۆكە قاراتا.
استانا اكىمىنىڭ سوزىنە قاراعاندا، ناۋرىز ايىنىڭ قورىتىندىسىندا ەلوردا ينفلياتسيا دەڭگەيى بويىنشا 5-6- ورىندا تۇر.
«ال ازىق-تۇلىك بەلدەۋىنە قاتىستى ايتار بولسام، نۇرسۇلتان ءابىش ۇلى سوڭعى 5 جىلدا بەلدەۋ دامىدى. اقمولا، قاراعاندى، پاۆلودار وبلىستارىندا استانا بازارلارىنا ونىمدەرىن اكەلەتىن كاسىپورىندار بار. جانە دە ەلوردالىق كاسىپورىندار قالانى 31 پايىزعا قامتىپ وتىر. 44 پايىزى كورشىلەس وبلىستاردىڭ كاسىپورىندارى ەسەبىنەن قامتاماسىز ەتىلەدى. ولار استانانىڭ بازارلارىنا باعدارلانعان»، - دەدى اسەت يسەكەشەۆ.
كەلەسى كەزەكتە ق ر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى ءومىرزاق شوكەيەۆتى ورنىنان تۇرعىزعان ەلباسى وسى ماسەلەگە قاتىستى ەسەپ بەرۋىن سۇرادى.
«ءبىز 20 ءونىم ءتۇرى بويىنشا تەرەڭ ساراپتاما جاسادىق. 12 ءتۇرى بويىنشا تولىقتاي 100 پايىز قامتاماسىز ەتىپ وتىرمىز. ولار: ەتتىڭ بارلىق ءتۇرى، قۇس ەتى، كارتوپ، قىزىلشا، قيار، قىزىناق. 8 ءتۇرى بويىنشا بىزدە 70 پايىز قامتاماسىز ەتىلسە، 30 پايىزى بويىنشا ناقتى شارالاردى بەلگىلەدىك. بىزدە استانا توڭىرەگىندە سۋارمالى جەرلەردى ۇلعايتۋ كەرەك. قازىر ەلوردانىڭ توڭىرەگىندە 2 مىڭ گەكتار جەر دايىن، قۇبىرلارى جاتىر، ەندى جاراقتاندىرۋ قاجەت. سونىمەن قاتار نۇرا، ەسىل ارناسى ماڭىنان دا 2 مىڭ گەكتار جەر تابامىز»، - دەدى ءومىرزاق شوكەيەۆ.
وسى رەتتە قازاقستان پرەزيدەنتى ءوزىن اۋىل شارۋاشىلىعى ونىمدەرىمەن تولىقتاي قامتاماسىز ەتكەن ەل ناعىز تاۋەلسىز مەملەكەت سانالاتىندىعىن باسا ايتتى.
«ءبىز اۋىل شارۋاشىلىعى ەلىمىز عوي. ءبىز ءالى كۇنگە دەيىن ونىمدەردىڭ باسىم بولىگىن سىرتتان الىپ وتىرمىز. ەت وندىرەمىز، شۇجىقتى سىرتتان الامىز. جەمىس-جيدەك، كوكونىستى دە تاسىمالدايمىز. بىزدە نە بار، سونىڭ بارلىعىن سىرتتان الىپ وتىرمىز. مۇمكىن ناندى دا سىرتتان الاتىن شىعارمىز»، - دەدى مەملەكەت باسشىسى.
سونىمەن قاتار نۇرسۇلتان نازاربايەۆ ق ر پرەمەر-ءمينيسترىنىڭ ورىنباسارلارى ەربولات دوسايەۆ پەن ءومىرزاق شوكەيەۆكە ازىق-تۇلىك ماسەلەسىنە قاتىستى بارلىق تۇيتكىلدەردى شەشۋدى تاپسىردى.
«بۇل سەندەرگە ءۇي تاپسىرماسى. باقىتجان ءابدىر ۇلى (ۇكىمەت باسشىسى) ءتۇسىندىڭ بە؟ ورىنباسارلارىڭمەن جاقسىلاپ جۇمىس ىستە»، - دەدى ەلباسى.
