ءبىز الەمدىك ستاندارتقا ساي، زاماناۋي قالا سالدىق - ەلباسى

بۇل تۋرالى شاھاردىڭ دامۋى تاقىرىبىنا ارنالعان ماجىلىستە ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.

«ەلوردامىزدىڭ 20 جاسقا تولعان مەرەكەسىن بارلىعىمىز بىرلەسىپ جاقسىلاپ اتاپ ءوتۋىمىز كەرەك، ول ەلدىڭ قۋانىشى. سونى جاسايتىن جوسپارلارىمىزدىڭ بارلىعىن انىقتاۋ ءۇشىن بۇگىن كەزدەسىپ وتىرمىز. قالانى قالاي سالىپ، قالاي كوتەرگەنىمىز بارلىعىمىزدىڭ ەسىمىزدە. سۋىققا دا، ىستىققا دا قاراماستان، ەلوردانى سالۋعا، ءارى دامىتۋعا قازاقستاننىڭ ءار تۇكپىرىنەن ادامدار كەلدى، ياعني بارلىق وڭىرلەر اتسالىستى. بۇگىندە بۇكىل الەم قىزىعىپ تامسانادى. الەمدىك ستاندارتقا ساي، زاماناۋي قالا سالدىق»، - دەدى مەملەكەت باسشىسى.

وسى ورايدا ەلباسى استانا ەكونوميكالىق دامۋدىڭ درايۆەرىنە اينالعانىن، 20 جىل ىشىندە قالانىڭ جالپى وڭىرلىك ءونىمى ەلەۋلى تۇردە ۇلعايعانىن، ەلوردا ينۆەستيتسيا تارتۋ باعىتىندا كوشباسشىلاردىڭ ءبىرى بولعانىن اتاپ ءوتتى. باس قالادا ەڭ ءىرى كورپوراتسيالار، ترانسۇلتتىق كومپانيالاردىڭ كەڭسەلەرى جۇمىس ىستەيدى. سونىمەن قاتار، وتاندىق كاسىپورىندار، قارجىلىق ءارى ءوندىرىس ۇيىمدارى قىزمەتتەرىن جالعاستىرۋدا.

«استانا ەلىمىزدىڭ ەڭ جىلدام ءوسىپ كەلە جاتقان قالاسى. تۇرعىنداردىڭ سانى ءۇش ەسە كوبەيىپ، بۇگىندە 1 ميلليوننان استى. حالىق سانىنىڭ وسۋىمەن قاتار، قۇرىلىس جۇمىستارى قارقىندى جۇرگىزىلۋدە. 20 جىل ىشىندە جيىرما ميلليون شارشى مەتر جاڭا تۇرعىن ءۇي پايدالانۋعا بەرىلدى. وسى جىلداردا 53 جاڭا مەكتەپ، 26 اۋرۋحانا، 4 اۋدان قۇردىق. ەلوردا جالىندى جاستاردىڭ قالاسى. قازىر قالا تۇرعىنىنىڭ ورتاشا جاسى وتىزدا»، - دەپ توقتالدى ن. نازاربايەۆ.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى