استانا نىساندارىن ءتيىمدى پايدالانۋ ءۇشىن ارنايى كومپانيا قۇرىلادى

بۇل تۋرالى ەلباسىنىڭ قاتىسۋىمەن ەلوردانى ودان ءارى دامىتۋ ماسەلەلەرى جونىندەگى ماجىلىستە شاھار باسشىسى اسەت يسەكەشەۆ ايتتى، دەپ حابارلايدى «قازاقپارات» ح ا ا ءتىلشىسى.

«مادەني جانە سپورتتىق شارالار بويىنشا ايتار بولساق، ءبىز قالاداعى نىسانداردى پايدالانۋ تيىمدىلىگىن ارتتىرۋ ءۇشىن ارنايى كومپانيا قۇرىپ جاتىرمىز. قازىردىڭ وزىندە «بارىس ارەنا» جانە «قازاقستان» سپورت كەشەنى سول كومپانياعا تاپسىرىلدى. الداعى ۋاقىتتا وعان تاعى دا «استانا ارەنا» مەن «الاۋ» مۇز ايدىنى، سالىنىپ جاتقان جەكپە-جەك سارايى بەرىلەتىن بولادى»، - دەدى يسەكەشەۆ.

ونىڭ ايتۋىنا قاراعاندا، مۇنداعى ماقسات - نىسانداردىڭ حالىقارالىق سەرتيفيكاتسياسىن قامتاماسىز ەتىپ، قازاقستاندا، رەسەيدە جانە ت م د ەلدەرىندەگى ءىرى مادەني جانە سپورتتىق شارالاردى ەلوردادا وتكىزۋ.

«قازىرگى تاڭدا وتاندىق ماماندارمەن كوماندا قۇرىلىپ، ونىڭ باسشىلىعىنا ءبىز Madison Square Garden- ءنىڭ (نيۋ-يورك قالاسىنداعى جىلىنا 320 شارا وتەتىن ءىرى سپورتتىق ارەنا - اۆت.) ۆيتسە-پرەزيدەنتى روبەرت ۋيليامستى شاقىرىپ وتىرمىز. «بارىس ارەنانىڭ» وزىندە وسى جىلى 70 كە جۋىق شارا وتكىزىلمەك. وعان 500 مىڭعا جۋىق كورەرمەن كەلەدى دەپ جوسپارلانۋدا. ال جالپى، جىل بويى قالادا ءارتۇرلى اۋقىمداعى 700 گە جۋىق شارا وتكىزىلەدى»، - دەدى قالا باسشىسى.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى