باستاۋ بيزنەس جوباسىنىڭ ناتيجەسى قانداي

بيزنەس كوممۋنيكاتسيالاردى مەملەكەتتىك تىلدە دامىتۋ دەپارتامەنتىنىڭ ديرەكتورى باۋىرجان ورازعاليەۆتىڭ ايتۋىنشا، وتكەن جىلى ارنايى وقىتۋ كۋرستارىنان وتكەن ازاماتتاردىڭ 20 پروتسەنتى ءوز كاسىبىن اشتى.

«بيىل اتالعان باستامانىڭ اۋقىمى كەڭەيدى. ەندى، 80 اۋداننىڭ ورنىنا 160 اۋداندى قامتيمىز. بۇدان بولەك، 14 وبلىس ورتالىعى مەن 27 مونوقالادا وقىتۋ شارالارىن ۇيىمداستىرامىز. سەبەبى «باستاۋ بيزنەسكە» سۇرانىس بار. جالپى، اعىمداعى جىلى 30 مىڭ ادامدى وقىتىپ، كەم دەگەندە، 6 مىڭ ادامعا بيزنەس اشۋعا جاعداي جاسايمىز»، - دەدى ب. ورازعاليەۆ ۇكىمەت ۇيىندە وتكەن باسپا ءسوز ءماسليحاتىندا.

ونىڭ سوزىنە قاراعاندا، «باستاۋ بيزنەس» قاتىساتىن ادام ءبىر اي بويى كاسىپكەرلىكتىڭ قىر- سىرىن مەڭگەرەدى. كۇندە تۇسكە دەيىن ءتورت ساعاتتىق تەوريالىق ساباقتار وتەدى. ال تۇستەن كەيىن پراكتيكالىق شارالار ۇيىمداستىرىلادى. سول كەزدە قاتىسۋشىلار تاجىريبەلى مامانداردان كەڭەس الىپ، وزدەرىنىڭ بيزنەس- جوبالارىن ازىرلەيدى.

«ءبىر جىلدىڭ ىشىندە ءبىز ءبىراز ماسەلەلەردى انىقتادىق. ماسەلەن، اۋدانداردىڭ مامانداندىرۋ كارتالارى كوپ جاعدايدا شارتتى تۇردە جاسالعان. اتالعان قۇجاتتاردى ءالى دە جەتىلدىرۋ كەرەك. سول سەبەپتى بيىلدان باستاپ ءبىز ءاربىر جوبانى ءوڭىردىڭ ەكونوميكالىق ومىرىنە بارىنشا بەيىمدەۋگە كۇش سالامىز. سونىڭ ارقاسىندا بيزنەستىڭ ومىرشەڭدىگى ارتادى. «اتامەكەننىڭ» اۋداندىق پالاتالارى دا ءوز كومەگىن بەرىپ وتىرادى»، - دەپ اتاپ كورسەتتى ب. ورازعاليەۆ.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى