قولتاڭبا - ادامنىڭ تابيعاتى
كەزىندە ك س ر و- دا گرافولوگتار قۋدالاندى. گرافالوگياعا قاتىستى بارىلىق ماتەريالداردى ورتەپ جىبەردى. كەرىسىنشە، امەريكادا گرافولوگتاردى قاتتى قولداعان. قىلمىستىق ىستەردە، قىلمىسكەردىڭ مىنەز- قۇلقىن انىقتاۋ ءۇشىن ولاردىڭ كومەگىنە ءجيى جۇگىنىپ وتىرادى ەكەن. دەمەك، گرافولوگيا بەلگىلى ءبىر ورنى بار عىلىم. گرافولوگيا - گرەك تىلىنەن اۋدارعاندا γράφω - جازامىن، λόγος - ۇيرەنەمىن دەگەن ماعىنانى بىلدىرەدى. العاشقى گرافولوگيالىق زەرتتەۋلەر 1871 -جىلى جان- يپپوليت ميشوننىڭ (1806-1881) جازبالارىندا كەزدەسەدى. Ⅱعاسىرعا جۋىق ۋاقىت بولدى، گرافولوگيا قىلمىستىق ىزدەستىرۋ مەن پسيحولوگيامەن بىتە قايناسىپ دامىپ كەلەدى. Ⅱعاسىر دەپ وتىرعان سەبەبىمىز ەۋروپالىقتار گرافالوگياعا سول ۋاقىتتان باستاپ عىلىم رەتىندە قاراي باستادى. ⅩⅩعاسىردىڭ ورتاسىنا قاراي بۇل عىلىم باتىستا قارقىندى دامىدى. گرافولوگتار ءسىزدىڭ مىنەز- قۇلقىڭىزدى قويعان قولىڭىز بەن جازۋىڭىزعا قاراپ انىقتايدى. ءسىزدىڭ قولتاڭباڭىزدىڭ باعىتى، ۇزىن- قىسقالىعى، ارىپتەردىڭ ۇلكەن كىشىلىگى، قايىرىلۋى، ۇشتالۋى، ءبىر- بىرىمەن جالعانعان جالعانباعاندىعى ارىپتەردىڭ انىق تۇسكەندىگى، تۇسپەندىگىنە قاراپ مىنەز- قۇلقىڭىزدى انىقتاپ بەرەدى. گرافولوگيالىق كىتاپتاردا جازىلۋىنشا، قولتاڭبا ستاندارت بويىنشا - 1-2 سانتيمەتر، ارىپتەردىڭ كولەمى - 0,5 سانتيمەتر بولۋى كەرەك ەكەن.
قولتاڭباڭىزدىڭ باعىتىنا ءمان بەرىپ قاراڭىز، تۋرا ما، جوعارى الدە تومەن بە؟ ەگەر، قولتاڭبانىڭ سوڭى جوعارىعا قاراتىلىپ بىتسە، ول ادام وپتميزم يەسى بولىپ، كەز كەلگەن ومىرلىك، تۇرمىستىق قيىندىقتارعا شىدامدى، بولاشاقتان كۇدەر ۇزبەيتىن بولادى ەكەن. قولتاڭبا تۋرا بولسا - بۇنداي قولتاڭبا يەلەرىنىڭ بويىندا وپتيميزم مەن پەسسيميزم تەڭ بولادى. اينالاداعى جاعدايلار بۇلارعا قاتتى اسەر ەتپەيدى. ەگەر قولتاڭبانىڭ سوڭى تومەنگە قاراتىلسا - قولتاڭبا يەسىندە پەسسيميزم باسىم. كوركەم ونەرگە قىرى جوق، وزىندىك پىكىرى دە جوق. وزگەلەردىڭ پىكىرىن ماقۇلداۋمەن ءومىر سۇرەدى.
قولتاڭبانىڭ ۇزىن بولۋى - مۇنداي قولتاڭبا يەلەرى سالماقتى بولادى. اسىققاندى ءتىپتى دە ۇناتپايدى. ويلاعان ماقساتىنا جەتۋ ءۇشىن ايانباي ەڭبەك ەتەدى. سونىمەن بىرگە، اينالاسىنا ۇنەمى سىني كوزبەن قارايدى.
قولتاڭبانىڭ قىسقالىعى - كەرىسىنشە مۇنداي تيپتەگى ادامدار ۇنەمى اسىعىپ جۇرەدى. سۇقباتتاسىنىڭ سابىرلى ادام بولعانىن جاقتىرمايدى. بۇلارعا سەنىپ تاپسىرىلعان ءىس ءارقاشان شالا ورىندالادى. ۇزاق ۋاقىتتى الاتىن جۇمىسپەن اينالىسۋ ولاردىڭ ءىشىن پىستىرىپ جىبەرەدى. ولار ءۇشىن جۇمىس ەمەس، ۋاقىت ماڭىزدى.
ارىپتەردىڭ كولەمىنە توقتالايىق. تابيعاتىنان ىنجىق، اينالاسىنا تالاپ قويعىش ادامداردىڭ جازۋىنداعى باس ءارىپتىڭ ۇلكەندىگىنىڭ ايىرماشىلىعى باسقالاردان كادىمگىدەي سەزىلىپ تۇرادى. سالماقتى، سابىرلى ادامداردىڭ جازۋىنداعى باس ءارىپ باسقا ارىپتەرمەن اراسى قىسقا كەيىنگى ارىپتەردەن ايتارلىقتاي ۇلكەن بولمايدى. جانۇيادا اقىلدى، ۇنەمشىل ادامداردىڭ قولتاڭبالارىنىڭ باسى كىشى ارىپتەرمەن باستالادى. ءىرى ارىپتەرمەن، بالالار سياقتى باسىپ، انىق قولتاڭبا قوياتىندار - قيالي، اڭقاۋ، سەنگىش بولادى.
ءيىرىپ، قىرلى ارىپتەرمەن ساندەپ قول قوياتىندار - كوڭىلى بوس، سالماقتى جۇرەتىن ادامدار. كەرىسىنشە، تىك، ۇشتى ارىپتەرمەن قول قوياتىندار ءوز- ءوزىن قاتتى جاقسى كورەتىن ادامدار بولادى ەكەن. شيىرلاپ قول قوياتىندار ۇنەمى سىني كوزقاراستاعى ادامدار. اراسىن ءجيى ءۇزىپ قول قوياتىندار - قيالعا بەرىلگىش، ادامداردىڭ نازارىن وزىنە قاراتۋدى قالايتىن، قوعامنىڭ الدىندا جاقسى جاعىمەن قالۋعا تىرىساتىن ادامدار.
Massaget.kz
