الماتىدا قۇرمانعازىنىڭ قۇندى جادىگەرلەرى كورمەگە قويىلدى
ىقىلاس اتىنداعى حالىق مۋزىكالىق اسپاپتار مۋزەيىندە ءۇش كۇندىك كورمە اشىلدى. كوشپەلى كورمەگە رەسەيدىڭ استراحان وبلىسى التىنجار اۋىلىندا ورنالاسقان «قۇرمانعازى اتىنداعى مادەني ورتالىق» قورىندا ساقتالعان كۇيشى دومبىراسىنىڭ كوشىرمەسى مەن قۇرمانعازىنىڭ ءتول شاكىرتى ەرعالي ەسجانوۆتىڭ دومبىراسى اكەلىنگەن.
سونىمەن قاتار، الماتىلىقتار اتىراۋ وبلىستىق تاريحي- ولكەتانۋ مۋزەيى قورىنداعى قۇرمانعازىنىڭ دارا اۋىز مىلتىعى مەن شاكىرتى دينا نۇرپەيىسوۆانىڭ بەلبەۋى، باتىس قازاقستان وبلىستىق تاريحي- ولكەتانۋ مۋزەيىنىڭ قورىنداعى دينا اپامىزدىڭ قامزولى، ⅩⅨ عاسىرداعى كونە زەرگەرلىك بۇيىمدار قويىلدى.
اسا قۇندى جادىگەرلەر بۇگىن سالتاناتتى تۇردە ىقىلاس اتىنداعى مۋزەيگە تابىستالماق.
مادەني شارا قازاقتىڭ كۇي ونەرىنىڭ شەبەرى قۇرمانعازى ساعىرباي ۇلىنىڭ 200 جىلدىعىنا وراي وتكىزىلىپ وتىر.
«قۇرمانعازى - تەك ءبىزدىڭ عانا رۋحاني مۇرامىز ەمەس، بۇكىل الەمگە تانىلعان تۇلعا. قۇرمانعازى بابامىزدىڭ 200 جىلدىعى يۋنەسكو شەڭبەرىندە اتالىپ وتۋدە. وسىعان وراي استراحانداعى قۇرمانعازى اتىنداعى مادەني ورتالىق پەن ورال، اتىراۋ وڭىرلەرىنەن تاريحي ولكەتانۋ مۋزەيلەرىنىڭ ۇجىمىن شاقىرىپ وتىرمىز. ءبىزدىڭ ماقساتىمىز وسىنداي مادەني شارالار ارقىلى قۇرمانعازىنىڭ 200 جىلدىق مەرەيتويىنىڭ مازمۇنىن اشا ءتۇسۋ. ءبىزدىڭ باستى مىندەتىمىز قۇرمانعازى شىعارماشىلىعىن، دومبىراسىن، شاكىرتتەرىنىڭ مۇراسىن، حالىققا قالدىرعان كۇي مۇراسىن جيىنتىقتاي وتىرا ناسيحاتتاۋ، دارىپتەۋ، جاڭعىرتۋ ۇرپاق ساناسىندا ساقتاۋعا بارىنشا ۇلەسىمىزدى قوسۋ بولىپ تابىلادى»، - دەدى ىقىلاس اتىنداعى حالىق مۋزىكالىق اسپاپتار مۋزەيىنىڭ ديرەكتورى، فيلولوگيا عىلىمدارىنىڭ كانديداتى ۇلجان بايبوسىنوۆا.
ايتا كەتۋ كەرەك، اتالعان ءىس- شارا الماتى اكىمدىگىنىڭ، قالالىق مادەنيەت باسقارماسىنىڭ قولادۋىمەن وتكىزىلىپ وتىر.
اۆتور: گۇلميرا عوسمانالي
