جالعىزباستى ورالماندارعا بولەك كۆوتا بەرىلەدى - نۇرجان التايەۆ
ق ر ەڭبەك جانە حالىقتى الەۋمەتتىك قورعاۋ ۆيتسە- ءمينيسترى نۇرجان التايەۆتىڭ ايتۋىنشا، بۇگىنگى زاڭنامادا «قونىس اۋدارۋشىلار مەن ولاردىڭ وتباسى مۇشەلەرى» عانا كورسەتىلگەن. ال جاڭا زاڭ جوباسى بويىنشا قونىس اۋدارۋشىلاردى جەكە- جەكە، سونىڭ ىشىندە نەكەگە تۇرماعان ازاماتتاردى دا مەملەكەتتىك قولداۋ شارالارىمەن قامتىپ، وڭىرلىك كۆوتاعا ەنگىزۋ جوسپارلانىپ وتىر.
«بۇعان دەيىن ورالمانداردىڭ وتباسىنا عانا كۆوتا ءبولىندى. وكىنىشكە قاراي، زاڭدا سونداي ءبىر ولقىلىق بولدى. ال جالعىزباستى ورالمانداردىڭ زاڭدى مارتەبەسى بولمادى. ونداي ازاماتتار از ەمەس. ەندى، جاڭا زاڭ جوباسى اياسىندا وتباسى بار ورالماندار عانا ەمەس، جالعىزباستى ورالماندار دا كۆوتا الا الادى» ، - دەدى ن. التايەۆ استانادا وتكەن باسپا ءسوز ءماسليحاتىندا.
بۇدان بولەك، ورالمانداردىڭ قازاقستان ازاماتتىعىن الۋىنا قاتىستى سان الۋان ماسەلەلەر بار. اتاپ ايتقاندا، ءبىر جىلدىڭ ىشىندە ازاماتتىقتى الىپ ۇلگەرمەگەن ورالماندار از ەمەس. وسىعان بايلانىستى ورالمان مارتەبەسىن ۇزارتۋ تۋرالى شەشىم قابىلداندى. ول دا جاڭا زاڭنىڭ جوباسىندا بار.
«ەندى، ورالمان مارتەبەسىن ءۇش ايعا سوزۋعا بولادى. ول ءۇشىن جەرگىلىكتى اتقارۋشى ورگاندارعا ءوتىنىش بەرۋ كەرەك. ءبىراق ونداي مۇمكىندىك ءبىر رەت قانا بەرىلەدى. ال ءوتىنىشتى ورالمان مارتەبەسى اياقتالعاننان كەيىن التى ايدىڭ ىشىندە جازۋعا بولادى» ، - دەپ اتاپ كورسەتتى ن. التايەۆ.
ۆيتسە- ءمينيستردىڭ سوزىنە قاراعاندا، قازىرگى كەزدە «ورالمان» دەگەن ءسوزدىڭ ورنىنا «وتانداس» جانە تاعى باسقا تەرميندەردى قولدانۋ ماسەلەسى قارالىپ جاتىر.
«بۇل ماسەلە ساراپتامادان ءوتۋى كەرەك. سول كەزدە كورەمىز، نە قالدىرامىز، نە باسقا تەرمينگە وتەتىن بولامىز. كوميسسيا ءوز جۇمىسىن اياقتاعاننان كەيىن بەلگىلى بولادى» ، - دەدى ن. التايەۆ.
ايتا كەتكەن ءجون، تاۋەلسىزدىك العالى بەرى قازاقستانعا 1 ميلليوننان استام ورالمان كوشىپ كەلدى. ولاردىڭ باسىم بولىگى - وزبەكستاننان ورالعاندار. وتكەن جىلى كەلگەن وتانداستاردىڭ سانى 18605 ادام بولدى. بيىل ودان دا كوپ بولادى دەگەن بولجام بار. ورالماندارعا قاتىستى جاڭا زاڭ جوباسى پرەزيدەنتتىڭ قول قويۋىنا جىبەرىلدى.
فوتو: ec-sport.kz
