استاناداعى «الما» ساۋدا ورتالىعىنان قاۋىپتى ازىق-تۇلىك پەن ويىنشىقتار تابىلدى
اتالعان قاۋىپ ءونىمنىڭ ماركاسىنداعى ورەسكەل بۇزۋشىلىقپەن بايلانىستى: تۇتىنۋشىعا ارنالعان ەتيكەتكادا ءوندىرۋشى مەن يمپورتەر تۋرالى اقپارات كورسەتىلمەگەن، دايىندالعان ۋاقىتى مەن پايدالانۋ مەرزىمى جازىلماعان، اقپارات مەملەكەتتىك تىلدە كورسەتىلمەگەن جانە ە ا س بەلگىسى، ياعني ەۋرازيالىق ەكونوميكالىق وداقتىڭ باعالاۋ پروتسەدۋراسىنىڭ تەحنيكالىق رەگلامەنتىنەن وتكەنىن راستايتىن بەلگى بولماي شىقتى.
قۇس ەتىنەن جاسالعان تەز بۇزىلۋعا بەيىم، شىعارىلعان ۋاقىتى مەن پايدالانۋ مەرزىمى كورسەتىلمەگەن ونىمدەر ينفەكسيالىق اۋرۋلاردىڭ تاراۋى مەن ازىق-تۇلىكتەن ۋلانۋعا اكەلىپ سوعۋى مۇمكىن.
20- ناۋرىز 2018-جىلعى زەرتحانالىق سىنامانىڭ ناتيجەسىندە «الما» سۋپەرماركەتىندەگى تەز بۇزىلاتىن كونديتەرلىك ونىمدەرگە جۇرگىزىلگەن تەكسەرۋ كەزىندە «پراگا» بيسكۆيتتى تورتىندا (ءوندىرۋشى - «Glamour Product» (استانا) ميكروبيولوگيالىق كورسەتكىشتەردىڭ نورمادان كوپ ەكەنى جانە اشىتقىنىڭ 12 ەسە كوپ قولدانىلعانى بەلگىلى بولدى. ال ماركىلەۋگە كەلگەندە دايىنداۋشى مەن ونىڭ ورنالاسقان جەرى جازىلماعان.
انىقتالعان ميكروبيولوگيالىق زاتتار ءونىمدى ساقتاۋ، تاسىمالداۋ، ولشەۋ مەن ساتۋ كەزىندە ساقتالۋعا ءتيىس تالاپتاردىڭ ورىندالماعانىن دالەلدەپ وتىر.
بۇعان قوسا، 2018-جىلدىڭ 27- ناۋرىزىندا «الما» سۋپەرماركەتىندە ساتىپ الىنعان «ARDANA Girl» تاۋار بەلگىسىنىڭ «سۋ پەرىسى قۋىرشاعى» مەن «كەنتاۆر قۋىرشاعىندا» شىعارۋشى مەن يمپورتەر تۋرالى اقپارات، بۇيىمدى پايدالانۋ مەن ساقتاۋ شارتتارى تۋرالى جادىناما، قۇرامى مەن پايدالانۋ مەرزىمى تۋرالى اقپارات جوق.
وسىعان وراي استانا قالاسىنىڭ قوعامدىق دەنساۋلىقتى قورعاۋ دەپارتامەنتى تۇرعىندارعا ازىق-تۇلىك پەن ونىمدەردى تاڭداۋ كەزىندە ماركاداعى جازبانى مۇقيات تەكسەرۋ كەرەكتىگىن ەسكەرتەدى. ماركىلەۋدە قاتەسى بار ءونىم تۇرعىنداردىڭ ءومىرى ءۇشىن قاۋىپسىز ەمەس.
