قازاقستانىڭ نىشانى «التىن ادام» ماسكەۋ كورمەسىنە قويىلدى
حالىقتىق جانە ساندىك- قولدانبالى ونەردىڭ بۇكىل رەسەيلىك مۋزەيى قازاقستان رەسپۋبليكاسى ۇلتتىق مۋزەيىمەن بىرلەسىپ ۇيىمداستىرىپ جاتقان «ۇلى دالا مۇراسى: زەرگەرلىك ونەر جاۋھارلارى» كورمەسىنە كەلگەن ماسكەۋ تۇرعىندارى مەن قوناقتارى قازاقستانىڭ نىشانى رەتىندە بۇكىل الەمگە تانىمال بولعان «التىن ادام» ەكسپوناتىن تاماشالاۋعا مۇمكىندىك الدى.
سونىمەن قاتار كورمەگە قازاقستان رەسپۋبليكاسى ۇلتتىق مۋزەيىنىڭ قورلارىنان ⅩⅨ عاسىر مەن ⅩⅩ عاسىردىڭ ورتاسىنا دەيىنگى ۋاقىتقا جاتاتىن كۇمىستەن جاسالعان ايەلدەر اشەكەيلەرى، ءبىزدىڭ زامانىمىزعا دەيىنگى VII- Ⅲ عاسىرلارعا تيەسىلى التىن بۇيىمدار قويىلعان. تانىستىرۋعا قويىلعان جادىگەرلەردىڭ جالپى سانى 170-تەن اسادى.
كورمەنىڭ سالتاناتتى اشىلۋ راسىمىندە ءسوز سويلەگەن قازاقستاننىڭ رەسەي فەدەراتسياسىنداعى توتەنشە جانە وكىلەتتى ەلشىسى يمانعالي تاسماعامبەتوۆ كەلۋشىلەر نازارىنا ۇسىنىلىپ وتىرعان ارتەفاكتىلەر ساق مادەنيەتىنىڭ زوومورفتىق «اڭ» ءستيلىن پاش ەتەتىندىگىمەن بىرەگەي سانالاتىندىعىن باسا ايتتى.
«التىن ادام» ماسكەۋ كورمەسىنە قويىلدى «سىزدەردى وسىناۋ كورمەدە قارسى الۋ ءبىز ءۇشىن ۇلكەن مارتەبە. بۇل كورمە بىرەگەي سانالادى. سەبەبى ەسىك قورعاندار كەشەنى مەن «التىن ادام» - بۇل ەلىمىزدىڭ ەڭ مىقتى تاريحي- مادەني ەسكەرتكىشتەرىنىڭ ءبىرى. قازىرگى قازاقستان اۋماعى - بۇل 8 - عاسىردان باستاپ ءبىزدىڭ زامانىمىزعا دەيىن ساق مادەنيەتىنىڭ قالىپتاسىپ، ودان ارى دامىعان كەڭىستىگى. (...) كوشپەلىلەر، ساقتار وسىناۋ مادەنيەتتىڭ تاسىمالداۋشىلارى رەتىندە وتە باي تاريحي مۇرا قالدىردى. دەگەنمەن، وكىنىشكە وراي اۋمالى- توكپەلى زامان سول ارتەفاكتىلەردىڭ ازداعان بولىگىن عانا بۇگىنگى كۇنگە دەيىن ساقتاۋعا مۇمكىندىك بەردى. ايتا كەتەرلىگى، «التىن ادام» 4 مىڭ التىن بۇيىمدار تۇرىندە تابىلدى. بۇل ەسىك كەشەنى قورعاندارىنىڭ قاپتالداعى قورىمىنىڭ بىرىنەن عانا الىنعان بۇيىمدار»، - دەدى ەلشى.
ر ف مادەنيەت ءمينيسترىنىڭ ءبىرىنشى ورىنباسارى ۆلاديمير اريستارحوۆ ماسكەۋدە اشىلعان كورمە «التىن ادامنىڭ» الەمدىك شەرۋىنىڭ باستاۋى ەكەندىگىن اتاپ ءوتتى.
«التىن ادام» ماسكەۋ كورمەسىنە قويىلدى«ت م د ەلدەرىمەن مادەني الىس- بەرىس پەن ىنتىماقتاستىق رەسەي فەدەراتسياسى مادەنيەت مينيسترلىگى جۇمىسىنىڭ باسىمدىعى سانالادى. «التىن ادامنىڭ الەم مۋزەيلەرىنە شەرۋى» حالىقارالىق جوباسىنىڭ ءبىرىنشى كورمەسىنىڭ ماسكەۋدە ءوتۋى ءبىز ءۇشىن زور مارتەبە. «التىن ادامنىڭ» تابىلۋى 20 - عاسىرداعى ارحەولوگيا سالاسىنىڭ ەڭ ءىرى وقيعالارىنىڭ ءبىرى بولىپ تابىلادى»، - دەدى ۆلاديمير اريستارحوۆ.
ال ر ف پرەزيدەنتىنىڭ حالىقارالىق مادەني ىنتىماقتاستىق جونىندەگى ارنايى وكىلى ميحايل شۆىدكو بۇگىنگى كورمەدەن قازاق مەملەكەتىنىڭ شىعۋ تەگىن، حالىقتىق تانىمى مەن مادەنيەتىن كورۋگە بولاتىندىعىن باسا ايتتى.
«بۇگىندە ءبىز سوڭعى جىلدارى ەلدىڭ قالاي قارقىندى دامىپ كەلە جاتقانىنا جانە وندا پرەزيدەنت نۇرسۇلتان نازاربايەۆ قانداي ماڭىزدى رولگە يە ەكەندىگىنە كۋامىز. «التىن ادام» ەلدىڭ باي- باقۋاتتى دامۋ تۇمارىنا اينالسىن»، - دەدى ول.
ايتا كەتەرلىگى، كورمە 13 - مامىرعا دەيىن جالعاسادى. «التىن ادامنىڭ الەم مۋزەيلەرىنە شەرۋى» حالىقارالىق كورمە جوباسىنىڭ مارشرۋتىنا شىعىس ازيا (جاپونيا مەن كورەيا)، ەۋروپا (اۆستريا مەن فرانسيا)، سونىمەن قاتار ت م د ەلدەرى مەن ا ق ش كىرەدى.
«التىن ادامنىڭ الەم مۋزەيلەرىنە شەرۋى» جوباسىنىڭ ماقساتى ەۋرازيانىڭ ۇلى دالا بەلدەۋىنىڭ باي مادەني مۇراسىمەن شەتەلدىك قوعامداستىقتى تانىستىرۋ.
اۋدارما: مارلان جيەمباي
